EDITORYAL - Kuwang ang ‘kursonada lang’

Daghang nakadayeg sa mga trabahanteng Pilipino didto sa abroad tungod sa katalagsaong manarbaho nga walay daghang reklamo ug barato ra’g suhol mao nga gibansagan sila nga hardworking people.

Tinuod ba gyud kini? Dili ba kaha swerte lang kay dili estrikto kaniadto ang pangempleyo sa abroad ug bisan sa panarbaho sa barko?

Wala man kaayoy mga gipangitang specialization o mga certificates sa trabahong sudlan kaniadto basta kursonada lang.

Ang dakong puntos lang gyud sa mga Filipino itandi sa ubang mga nasyonalidad mao ang kamahoan niini sa pinulongang English.

Sa paglambo sa ekonomiya sa Middle East misaka usab ang panginahanglan sa mga construction workers, katabang, engineers, managers, doctor ug uban pa.

Ang mga Pilipino maoy kinaham kay dali rang matudloan kay makamao man og English. Gani dunay uban nga kargador lang sa pantalan nakatrabaho gyud og overseas nga barko kay may kailang kapitan.

Dili estrikto ang labor ug safety standards kaniadto mao nga daghan ra ang makalusot ug makatrabaho apan mao kini hinungdan nga daghan sab ang mga naaksidente ug nangamatay.

Tungod niini giestrikto ang international labor and safety standards sa mga kompanya sa kalibotan maong di na mosalir ang “kursonada lang” karon.

Hulga na sab ang taga India, Bangladesh, Sri Lanka, China ug Indonesia kay nakat-on na sila og English mao nga kinahanglang mas mamuhonan sa edukasyon ang mga gustong mag OFW.

Sumala pa sa Philippine Talent Map Initiative pinaagi sa Department of Labor, 31.7 porsiyento sa 90 mil ka mga estudyante ug kadtong nakahuman na pagtungha ug nangita og trabaho karon ang kuwang og trainings  aron sila makatrabaho. Hinuon kadaghanan apil na kadtong nakatrabaho na, madawat gyud kun ang trabahong ilang sudlan magkinahanglan makamao og English.

Seryoso kini nga problema ug kinahanglang tutokan sa gobiyerno kini nga kakuwangon sa trainings sa Filipino labor force. Kay may epekto unya kini sa ekonomiya sa nasud umaabot nga panahon.