EDITORYAL - Nagpalaban ngadto sa UN

Mikisikisi ang Malacañang  ug gipasanginlan ang United Nations nga mipadako ug misakay sa mga kritiko sa presidente dinhi sa nasud human nga usa sa mga independenteng eksperto sa UN ang mipadayag nga nabalaka kini sa sitwasyon sa mga human rights advocates dinhi sa Pilipinas.

Sa report sa Philstar.Com, sa world report sa special rapporteur ngadto sa UN, ang human rights defender nga si Michel Forst nanawagan sa gobiyerno sa Pilipinas pagpahunong sa tanang matang sa pagpanghasi ngadto sa mga human rights defenders.

Matud pa niya sa maong report nga ang estado unta maoy manguna sa pagprotihir ug mosuporta sa mga tawong nanalipod sa tawhanong katungod inay nga sila lutoson.

Wala ganahi ang Palasyo sa maong report ug midemanda og klaripikasyon kabahin niini kay pabiling gibarogan sa Malacañang nga wala kini gilapas nga balaod ug wala kini mangyatak sa tawhanong katungod.

Ang tigpamaba sa Palasyo nga si Salvador Panelo mihulagway sa panawagan ni Forst nga pasagad lang, iresponsable ug giabusaran sa mga kritiko sa pangulo ang mekanismo sa UN.

Dili mabasol sa gobiyerno ang mga human rights advocates dinhi sa Pilipinas kun didto sila midangop sa UN aron pamation ang ilang tingog.

Kay wala may padulngan ang ilang mga tingog kun ang mismong presidente magsige og bahad ug panganti batok sa mga human rights advocates ug bisan na gani sa Commission on Human Rights apil sa gikastigo.

Importante nga adunay mobantay sa mga lihok sa gobiyerno aron dili kini moabusar sa gahom sama sa papel sa CHR nga pirmeng tigpahinumdom sa mga ahente sa gobiyerno nga mosubay gyud sa husto ug legal nga proseso.

Dili man kini kaayohan lamang para sa ahensya sa gobiyerno kondili para sa tanan apil sa gobiyerno.

Kun tinuod ug kombinsido ang Palasyo nga kining mga right groups sinuholan ug gigamit sa mga politikong kaaway sa presidente mas maayong subayon ug kasohan sila sa malisyosong mga akusasyon.