Bong nakagawas sa split decision

Ang  libro sa balaod sa Pilipinas  nga giestudyohan, gihuptan ug gisunod sa mga magbabalaod, ma-abogado, ma-piskal, ma-huwes o ma-chief justice man, usa ug pareha ra gyud ang unod.

Apan makapahibulong!  Nganong diha sa pinaleng paghukom sa mga huwes, dili man sila managsama’g desisyon? Mausab ba diay ang bulok ug bayhon sa putli nga balaod?

Sama sa nahitabo ni Bong Revilla, kinsa human mabilanggo og upat ka tuig gikan sa miaging administrasyon tungod sa kasong plunder, karon ning panahon ni Pres. Rodrigo Roa R. Duterte, daw itom nga salampating nakagawas sa halwa human hukmi sa Sandiganbayan nga wala kunoy labot sa maong kasong kriminal.

Kay base sa ilang imbestigasyon, tanang transaksiyong ilegal bahin sa PDAF nga may mga sensitibong papeles nga pirmahan, ang iyang Senate staff nga si Richard Cambe, kinsa giasayin ni Bong isip iyang authorized representative, maoy tigpirma ug mipirma. Mao ba?

Ang pangutana mao: Kun si Cambe maoy mipirma alang sa dakong kantidad nga makuha gikan sa maong nakontrobersyal nga PDAF, siya ra ba usab ang midawat sa minilyong kuwarta?  Wala ba niya kini iintriga sa iyang amo?

Si Cambe empleyado ni Bong. Si Bong agalon ni Cambe. Kun buhing kahoy pa, si Bong ang punoan samtang si Cambe dahon o sanga lamang. Kun may mananap nga moukit sa dahon o mokabyon sa sanga, mabati gyud kini sa punoan sanglit ang dahon o sanga, kabahin man sa punoan. Imposible man nga kun ang sanga o dahon mobawogbawog ini’g hasmag sa kusog nga hangin, dili ma-feel sa punoan nga maoy gitapotan sa sanga o dahon?

Hinungdan, nabahin ang baroganan sa mga maghuhukom sa Sandiganbayan. Duha kanila, nagtuo nga sad-an gyud si Bong ug unta sama ni Janet Lim-Napoles angay lang sentensiyahan og reclusion perpetua (life sentence). Apan mayoridad mihukom nga walay labot si Bong sa maong pagpakasala. Busa, angay lang buhian.  Ug nakagawas si Bong sa selda pinaagi sa split decision.

Naglibog ko. Usa ra man unta ang batakang balaod nga maoy gibasehan sa tanang maghuhukom niining kasoha. Nganong wala magkahiusa ilang hukom? Abi nako’g sa boksing ra may split decision? Hasta sab diay sa Sandiganbayan? Ngano kaha, no?