Kaisog ni Gabuya

Wala malilong kanato nga grabe na kaayo ang problema sa trapiko dinhi sa dakbayan.

Dili ikalimod nga ang problema sa trapiko naggumikan sa mga abusadong drayber nga dili motuman sa mga lagda sa tukmang pagmaneho og sakyanan.

Sulod sa daghang katuigan, gikataw-an lang sa mga abusadong drayber ang mga traffic enforcer dinhi sa dakbayan sa Sugbo kay samtang makadakop man tuod kanila kon sila masakpan, apan dili masakmit ang ilang mga lisensya.

Lahi kon ang mga sakop sa Land Transportation Office (LTO) maoy makadakop kanila nga imbargo gyud ang lisensya. Nalipay kaayo ko kay si Cebu City Councilor Eugenio Gabuya Jr. nagpakabana gyud aron mahapsay ang atong trapiko.

Misugyot siya og ordinansa nga magtugot na sa mga traffic enforcer nga sakmiton ang lisensya sa mga drayber nga masakpang nakahimo og salaod. Gipasar sa Cebu City Council ang maong ordinansa ug gipirmahan ni Mayor Tomas Osmeña.

Apan gusto nako karon nga pangunayan na usab ni Konsehal Gabuya sa paghimo og pakisusi kon ngano nga hangtud karon wala pa gihapon kini mapatuman.

Wala pa gihapon makasugod ang mga traffic enforcer sa pagsakmit sa lisensya sa mga drayber nga masakpang nakahimo og kalapasan sa balaod.

Dunay uban nga mihulagway sa maong ordinansa nga ilegal kay nakalapas kuno sa lagda sa Republic Act 4136, ang Transportation and Traffic Code.

Para nako, kadtong drayber nga magtuo nga kalapasan kini sa balaod, angay’ng modangop sa korte aron ang isyu madiskuter.

Usbon nako, pabor ko sa maong ordinansa ni Konsehal Gabuya ug ako siyang dayegon tungod niini. Karong bag-o na lang, gisuportahan usab ni Gabuya ang gisugyot nga Senate Bill nga mag-require sa mga mopalit og motor, ug tingali kadtong tag-iya og motor, nga moagi gyud og pagbansaybansay.

Daghan sa mga tag-iya og motor walay praktis mao nga reckless kaayo nga mopadagan diha sa karsada. Nasayod ko nga dunay mga tawo nga masuko kang Gabuya niining iyang gihimo, apan awhagon  nako ang kadaghanang katawhan nga ato siya nga suportahan.

* * *

Angay’ng hawanan gyud sa mga sakop sa Probe Team ang Alviola Street gikan sa mga butang nga gipangbutang sa mga abusado diha sa daplin sa karsada ug sa aseras.

Ang Alviola Street mao kanang karsada nga anaa manukad sa General Maxilom Avenue ug milagbas sa Barangay Carreta, ug dayon ang tumoy adto molapos sa T. Padilla Extension sa Barangay Tejero.

Kon mahawanan na ang karsada, ang mga motorista moagi na diha ug makatabang kini sa pagpamenos sa problema sa trapiko dihang lugara.