Dili mahigtan ang balaod

Ang sugo ni Presidente Rodrigo Roa Duterte ngadto sa iyang mga kapolisan ubos sa iyang war on drugs nga programa mao:

“Gukda ug dakpa ang tanang nahilambigit niining illegal drugs activities.

Kon mosukol pinaagi sa paggamit og makamatayng armas, aw...pusila-patya agig pagpanalipod sa inyong kaugalingon.

Paninguha nga dili maunhan!”

Sigun sa akong nasayran, kon ang dakponon moikyas-dagan, salbahan kini sa migukod nga polis og tulo ka higayon paghatag og warning sa gigukod nga mohunong na lang ug mosurender.

Kon mokaratil gihapog ipsot, diha na pusilon sa bitiis o paa aron kon maigo, dili na makatulin pagdagan. Ug dali na lang maposasan.

Kana kon walay dalang armas ang dakponon.

Apan makapakurat kadtong nahitabo sa 17 anyos nga Kian Lyod de los Santos, kinsa gipasanginlang drug runner, diin dihang gidakop sa tulo ka  polis, wala lang guyora, kondili gidala pa gyod sa nagkato nga alad sa baboy ug ginudnod-pasimhot sa dili maantos nga kabaho sa hugaw.

Unya, wala pa matagbaw ang mga otoridad, gidala na sab si Kian ngadto sa Tullahan River, gipalingkod nga natagbaw intawog panabon sa ulo nga nagsigeg hangyo: “Huwag po, Sir! Huwag, po!”

Ang bala nga miigo sa ulo ni Kian nagtug-an nga gikan sa itaas ang gikablit nga armas – lig-ong ebedinsiya nga nakasupalpal sa pagpamakak sa mga polis, kinsa miingon, nga misukol kuno si Kian.

Apan tin-aw kaayo ang kuha sa CCTV coverage nga mitug-an sa tinuoray nga gibuhat sa mga polis ngadto sa batang wala gyod intawoy bawot.

Busa, sa walay kukahadlok, mipakanaog si Caloocan RTC 125 Judge Rodolfo Azucena Jr. sa iyang patas ug makiangayong hukom – ang paghatag og reclusion perpetua nga sentensiya ngadto sa tulo ka sad-ang polis.

Dapat, hatagag medalya ni Tatay Digong si Judge Azucena kay samtang wala tumana sa tulo ka polis ang hustong pamaagi sa War on Drugs nga iyang gisangon kanila, diin makapahugaw lang hinuon sa kalimpiyo sa iyang tumong, si Judge Azucena mipakita sa tibuok kalibotan nga ang timbangan sa balaod sa Pilipinas patas, isog, lig-on ug dili mahigtan.

Kini makatabang pagpahayag nga dili iyaha ni Tatay Digong ang EJK.

Kon dili, iyaha sa wala magtinarong pagtuman sa iyang sugo.