Lingawlingaw ba ang salidang makaguol?

Walay nadato sa panrabaho. Gawas lang kaha kon apila’g negosyo ang pagpaningkamot sa pagpakabuhi ning kalibotan matag adlaw. Medyo modelanto gyod.

Hinuon, kon diniyos ang maong negosyo, inanay ang masinating pagtubo sa puhonan nga maoy gisugod pagbubo. Gawas lang kaha kon ang sudlang business, kinilo nga shabu. Kay ang kahimtang sa kinabuhi morag gimadyik.

Daling madato, daling makakabit og daghan ug dali pong mamatay kun maigo sa mga bala sa nag-riding-in-tandem. Kaanugon sa gitumpitumping bahandi nga biyaan man lang diay sa dayon samtang ang kalag mapunta sa impyerno.

Sa ato pa, mas nindot diay nga magtinarong ta pagpanrabaho dinhi sa yuta. Kon atong suweldo gamay kay high school graduate ra, maningkamot ta nga maka-eskuyla gyud’g kolehiyo hangtod makatapos og kurso.

 Pipila na ka security guards, kinsa bisag minyo  ug gulang na, milampos ug nahimong maestro gumikan sa walay hunong nilang pagpaningkamot? Usa kanila nahimo man ganing endorser sa usa ka brand sa kape!

Kinahanglang itanom sa kasingkasing nga kon kini nahimo sa uban, walay rason nga dili sab ni kaya nato. Miingon ang Ginoo, nga ang krus (misyon) nga gihatag Ko kaninyo, gaan. Sayon ra kini ninyong pas-anon. Busa, lihok tawo kay tabangan tika!

Kutob sa kinsay hugot nga misalig ug mituo sa Ginoo ug wala gyud mobulag Kaniya, silang tanan nagmalamposon. Sagad kanila, bisag managers na, ang gihimo nilang lingawlingaw simple ra – ang pagtan-aw og sine nga makalingaw ug makapakatawa.

Kamo, mga suking Banat News readers, unsang salidaha ang inyong tan-awon? Horrors ba, drama, love story, o very sentimental films nga mokumot sa inyong kasingkasing ug makapatulo sa inyong luha sa tumang kalagot ug kaguol?  Kon mao ni inyong paborito, napilde mo sa inyong gibayad.

Dili ba mitan-aw tag sine aron malingaw? Unya, nganong kana mang makahilak maoy pilion? Gani, dinhay eksperimento nga gihimo, diin human patan-awa sa doktor ang group A og sentimental nga salida, gikuhaan silag dugo ug giindeksiyon didto sa buhing ilaga. Namatay ang ilaga, uy!

Usab, ang group B nga ilang gipasaksi’g makalingaw nga pelikula, gikuhaan og dugo ug giindeksiyon sa himatyong ilaga. Resulta, nabuhi!  Kini nagmatuod lang, sa panultihon, nga LAUGHTER IS THE BEST MEDICINE.