EDITORYAL - Sundalo sa karsada

Makita diha sa kadalanan sa Sugbo ang mga kasundalohan nga nitabang sa pagmando sa trapiko. Dunay nahibulong ug duna say nalipay tungod kay lahi ra man gyud kon dunay taga gobiyerno nga magbantay.

Ang pag-deploy sa mga sundalo diha sa kadalanan nga nagdala og tag-as nga kalibre sa armas resulta kini sa gihimong tigom sa Inter-Agency Council for Traffic (IACT).

Ang Metro Cebu usa sa mga labing paspas ang kalamboan sa ekonomiya tungod sa nagkadaghang mga negosyo dinhi ug nagkadako usab nga populasyon.

Gawas pa, pwerteng gagmaya sa mga dalan dinhi apan pwerteng daghana sa mga sakyanan mao nga kuwangon gyud ang mga traffic enforcers aron mabantayan ang tanang dalan.

Dili naman kini hinuon bag-o kay si Cebu City Konsehal Dave Tumulak, nga Chairman sa Committee on Public Order and Safety kaniadto pa nagsige og awhag sa militar nga patabangon sa pagmando sa trapiko.

Gawas sa ilang pagtabang sa trapiko makatabang usab sila nga mamenusan ang kriminalidad sa kadalanan. Kana kon tuohan nga ang mga kriminal mahadlok gyud kanila.

Apan ang publiko adunay pagduhaduha sa ilang presensya tungod kay dili sama sa kapolisan nga anad na sa mga sitwasyon sa urban areas sama sa pagresponde sa mga civil disturbances sama sa mga hubog nga manghasi diha sa kadalanan ug uban pang ginagmay nga krimen, ang mga sundalo wala ma-train niini.

Gawas pa, ang mga militanteng pundok siguradong mokisikisi og maayo bahin niini tungod sa ilang kabalaka niining gitawag nga militarisasyon sa mga urban areas nga gipasangil nilang pag-inat sa martial law gikan sa Mindanao padung dinhi sa Kabisay-an.

Dili man tuod angay ikaalarma ang ilang presensya sa kadalanan ilabi na sa mga tarong nga mga lumolupyo apan dili kalikayang adunay mabalaka tungod kay dili normal sa usa ka mauswagon ug malinawong lugar sama sa Sugbo nga adunay mga sundalo diha sa kadalanan.