EDITORYAL - Death Squad

Ngipon sa ngipon. Mao kini ang gustong buhaton ni Pres. Duterte aron pakgangon ang mga rebeldeng New Peoples Army sa padayon nilang pagpanghasi sa katawhan dinhi sa nasud.

Si Duterte naglaraw pagtukod og death squad nga iyang isakbang sa mga gidudahang rebeldeng NPA ug mga sakop sa Special Partisan Unit (Sparu) ang liquidation squad sa mga komunista dinhi sa patag.

Ang Sparu nabantog kaniadtong dekada 70 hangtud 80 tungod sa ilang pagpatay sa mga sakop sa militar, kapolisan, gobiyerno ug bisan mga sibilyan ug mga negosyante nga nga ilang giingong nakasala sa katawhan.

Sa kasaysayan, ang Sparu  Unit maoy tigpahamtang sa silot nga gipagawas sa hukmanan sa mga komunista didto sa kabukiran nga gitawag og “Kangaroo Court” diin didto gihimo ang ‘husay’ bisan wala diha ang gikiha.

Sa dihang nikusog ang maong grupo nagbilin kini og dili maayong uwat ug kalisang sa panumdoman sa publiko. Halos kada adlaw nalang adunay mamatay nga kawani sa gobiyerno ug daghan usab ang mga inosenteng nabiktima.

Giatbangan usab kini sa panahon sa diktadoryang Marcos pinaagi sa ilang intelligence units. Apan nakaguba hinuon sa imahe sa administrasyon tungod kay niabusar sila ug daghang inosenteng sibilyan ang nabiktima kay bisan kadtong mga kritiko nga igo rang nipadayag sa ilang kahiubos sa gobiyerno, gipasanginlan naman hinuong mga rebelde sab.

Kun buhaton kini sa presidente dili kini makahatag og kalinaw ug kahupay sa mga kasingkasing sa katawhan. Mas pa, kun tinuod nga mga armadong sibilyan maoy himuong sakop sa death squad batok sa mga rebelde. Kanunay nga naa gyud ang tentasyon nga gamiton kini sa personal nga interes ilabi na nga wala silay kaakohan sa gobiyerno, sa katawhan ug sa balaod.

Ug labaw sa tanan, ngil-ad kaayong paminawon para sa militar ug kapolisan kay sa kadako na sa ilang sweldo ug sa kadaghan sa ilang mga sakop pakyas sila pagprotihir sa katawhan ug pagpabiling malinawon ang nasud.