Samsam ug Eddiegul best servants

Lahi ra gyud kun ang usa ka political leader, kinsa adunay kasingkasing nga moalagad ngadto sa katawhan.

Usahay, ang panahon nga angay  igahin unta ngadto sa iyang pamilya masakripisyo, kay maoy gipalabi ang pagtambong sa usa ka dakong kalihokan nga makahatag og kaayohan sa dapit ug mga lumolupyo nga iyang gipangga.

Sama sa gibuhat nilang Talisay City Mayor Eduardo ‘Eddiegul’ R. Gullas ug Kongresista Gerald Anthony ‘Samsam’ Gullas, kinsa bisan sa hulga sa bagyong Samuel, mitambong gyud sa groundbreaking niadtong Nobiyembre 20, uban nilang Presidential Assistant for the Visayas Michael Dino, mga opisyales sa dakbayan, mga nagkahiusang negosyante ug kadagkoan sa Cebu Port Authority alang sa P10B Cebu South Harbor and Container Terminal Corporation project nga tukoron sa may gilapdong 25 ektaryas nga yuta sa siyudad sa Talisay.

Kining world class nga pasilidad makapasulbong sa kita sa dakbayan ug makahatag og daghang job openings sa mga Talisaynon.

Apan makapahibulong. Kay aduna lang gihapoy nagprotesta batok niining proyektoha, kinsa sagad mga mangingisda nga nabalaka basi’g maapektohan ang inadlaw nilang kawsanan sa kapanginabuhian nga mao ang dagat.

Ilabi na kay adunay duruha ka barangay nga hagbay rang nanaglalis bahin sa hurisdiksyon ning naasoyng dapit ug hangtod karon nagpadayon.

Hinuon, mipatunga si Eddiegul ug mipadayag nga hatagan na lang og patas nga bahin ang matag habig sa higayon nga mokita na ang maong proyekto. Gisuportahan sab ni Samsam ang makiangayong sugyot sa apohan.

Gani, gisabot na man niya ang tulo ka incorporators ning proyektoha nga tagbuon nila ang mga mananagat, pabungaton unsay gusto aron kon unsay gikasabotan nga mahatag, ipaagi gyud og kasulatan nga mahiapil pagsulod sa Memorandum of Agreement (MOA) nga magbugkos sa duha ka habig, ang incorporators ug city government.

Ingon niini kahumok ang kasingkasing sa mga Gullas. Ang kadali ra gyud malooy ug makasabot sa panginahanglan nga gipangayo sa ilang isig ka ingon. Dili sila gusto’g kagubot.

Maoy ilang paborito ang kahusay, kalinaw ug kaangayan diha sa ilang pagpangalagad. Mga bulawanong hiyas nga sukad pa kaniadto hangtod karon wala gyud molubad.

Mao nga nakaingon ko: “Pagkasuwerte sa mga  Talisaynon, kay nakahupot  og duha ka the best public servants ning atong panahon.”