Mas hawod ni Samuel
Ang bagyong Samuel maoy sentro sa tanang pangandam sa lokal ug nasudnong mga buhatan sa kagamhanan sa mga dapit nga iyang maagian sa Mindanao, Kabisay-an ug Luzon.
Gibantayan sa Philippine Atmospheric, Geophysical and Astronomical Services Administration (PAGASA) ang tanan niyang lihok ug gitakda ang sunod niyang padulngan.
Apan wa mabantayi sa kadaghanan ang tinuod nga hawod nga nagpahipi lang. Siya maoy tinuod nga nagbuot asa paingon si Samuel ug asa siya tugpa.
Siya ang hinungdan nganong nakalingkawas ang Sugbo sa labing grabe nga epekto sa hangin ug uwan ni Samuel.
* * *
Ang hanging Amihan maoy nahimo natong labing lig-on nga taming batok sa pagpanghasi ni Samuel.
Ang kabugnaw sa Amihan maoy nakapalansang ni Samuel pagka tropical depression bisan sa mga pangagpas nga mokusog siya pagka tropical storm dayong tugpa sa yuta.
Ang kainit sa Pacific Ocean sa paglatas ni Yolanda lima ka tuig nang nilabay maoy nakatampo sa talagsaong kakusog sa iyang hangin lima ka tuig nang nilabay.
Ang Amihan nipabugnaw sa ngilit sa dagat nga maoy nakahikaw sa kahigayonan ni Samuel pagpanghagdaw og dugang puwersa aron nga mas mopaspas.
* * *
Ang Amihan sab ang nipasaka ug nipaubos sa agianan ni Samuel. Sa pagkusog sa Amihan, naduso paubos si Samuel paingon sa Caraga.
Sa paghinay sa Amihan, nakalighot si Samuel sa pagsaka paingon sa Samar ug Leyte.
Mao toy hinungdan nga lapad ang mga dapit nga gitakda sa PAGASA nga mahimong tugpahan ni Samuel: Sa Caraga ug sa Eastern Visayas.
Nga naglakip sa daghan uyamot nga mga dakbayan ug kalungsoran sa nag-atbang nga mga ngilit sa Mindanao ug Kabisay-an.
* * *
Dihang nagdanga-danga na si Samuel sa yuta, nikusog ang Amihan.
Maong naaghat si PAGASA Mactan Chief Al Quiblat sa pagpasidaan nga mahimong motugpa pag-usab si Samuel sa Metro Cebu gahapon sa buntag human sa iyang unang pagtugpa sa Caraga o Eastern Visayas.
Apan dayong tugpa ni Samuel, nihinay ang Amihan. Maong nisaka siya ug nitugpa gahapon sa alas-2 sa kadlawon sa Borongan City sa Eastern Samar, nga ibabaw na sa Sugbo.
Human nitugpa si Samuel, nikusog na sang Amihan, maong napabilin ang bagyo sa ubos ug nipaingon sa Roxas City sa Capiz dayong gawas paingon sa Palawan.
* * *
- Latest
