Pagtangtang sa mga mantsa (3)

Sa agup-opon nga lama o mantsa, ang asido sa suka ug ang grano sa asin, maoy makatangtang o makalimpyohan niini.

* Lama sa grasa (oil grease) – Lisud ni tangtangon kon wala tay ideya sa epektibo nga remedyo.

Sulayi ang paggamit sa likido nga panghugas sa plato o mga koryo sa kusina.

Imo lang butangan ang nagkagrasa nga lama sa bisti, unya  iandam ni nga ibutang sa ‘washing machine’, igo nga motuhop ang likidong sabon (liquid dish cleaner). Simple ug sayon ra kaayo, ighuman og laba, ihayhay kini nga paughong nakabantang sa kainit sa adlaw.

* Lama sa lipstick (lipstick stain) – Kon wala tuyoa nga naduhigan sa lipstick ang gisul-ob mo sa pagdinalidali, ayaw ni problemaha kay malimpyohan o matangtang ra kini kadiyot  pinaagi nga pahiran lang sa ‘baby wet wipes’. Ang alcohol sa ‘wet wipes’ maoy nakalimpyo ini.

* Mantsa o lama sa kape (coffee stain) – Labing simple ug epektibo nga panangtang ini, mao lang ang pagbasa nga baliburan og ‘baking soda’ direkta sa  lama sa kape.

Unya kusokusoha kini pag-ayo sa di pa normal nga labhan.

Ang mineral sa ‘baking soda powder’ maoy responsable sa paglimpyo sa lama ug usa sab kini ka ‘deodorizer’ pawagtang sa baho sa lawas.

* Mantsa o lama sa dugo (blood stain) – Malisud ug hasol ni tangtangon nga mamantsahan sa dugo, apan relaks lang kay dali ra ni maremedyohan pinaagi nga patuloan lang kini og ‘hydrogen peroxide’ direkta sa lama. Ighuman kusokusoha pag-ayo  sa dili pa kini normal nga labhan.

Ang ‘hydrogen peroxide’ gigamit sab ning ‘antiseptic’ nga panglimugmog ug panghunad sa samad o nuka aron sa pag-alkontra sa impeksyons.