Ang pagkamanggihatagon sa biyuda

Nobiyembre 11, 2018: Ikakatloag-duha nga

Domingo sulod sa tuig

MGA PAGBASA:  1 Mga Hari 17;10-16/Sal. 146/Heb. 9;24-28/Mk. 12;38-44

Ang mga biyuda kaniadto sa panahon ni Jesus nahisakop sa marginalized sector sa ilang katilingban. Wala silay tingog ug gani kun bata pa sila kinahanglan silang magminyo aron sa ingon mo survive sila financially. Mao nga sa dihang nakita ni Jesus nga ang biyuda nihatag sa iyang amot alang sa templo iyang gihatag ang iyang gikinahanglan dili sama sa uban nga ilang gihatag ang ilang sobra. Kini ang kahulogan sa pagkamanggihatagon. Mohatag ka sa imong giisip nga mahinungdanon alang nimo kaysa mopaambit ka sa bisan unsa nga wala nimo kinahanglana. Ning maong paagiha gidasig kita sa paghimo sa ingon sama sa gipakita sa biyuda bisan pa man kun ginagmay apan kinasingkasing bastante na kana.

LINTUNGANAY Fred P. Languido

Hostage sa politika

Taud-taud na nga na-hostage sa politika ang multi-billion peso nga proyekto diha sa Kawit Island nga karon nahimo na nga kabahin sa South Road Properties.

Tingali kon wala pa ipasulabi sa oposisyon dinhi sa dakbayan ang pamolitika hayan nasugdan na ang joint-venture agreement sa dakbayan sa Sugbo ug sa Universal Hotel and Resorts Inc., usa ka kompaniya nga gipanag-iya sa business tycoon nga si John Gokongwei.

Ang proyekto nga mokantidad og kapin sa P18 bilyones nga maglangkob sa katukuran sa usa ka resort ug casino gipaabot nga dili lang maghatag og dakong income sa Sugbo kondili maghatag sab og oportunidad sa trabaho alang sa mga Sugboanon.

Apan gihimo sa oposisyon ang tanan aron kini kababagan. Gikan sa kataw-anan nga rason sama sa pagkwestiyon sa katakos sa kompaniya nga gipanag-iya sa usa sa labing adunahang pamilya sa nasud ngadto sa pagpasaka og kaso sa korte.

Pastilan, kun nabalaka ang oposisyon nga makasapi si Mayor Tomas Osmeña sa maong proyekto ug magamit niya sa umaabot eleksiyon, pangita mo og laing paagi aron siya pildihon sa eleksiyon. Ayaw isakripisyo ang kalamboan ug ang oportunidad sa panarbaho.

* * *

Nangayo og P4.5 bilyones nga danyos ang 39 ka mga molupyo sa Dakbayan sa Naga kang kansang mga mahal sa kinabuhi apil sa kapin sa 70 ka mga nakalas atol sa pagdahili sa yuta didto sa Sitio Sindulan, Barangay Tinaan niadtong Septiyembre.

Ang pamilya sa mga namatay misang-at og class suit atubangan sa Regional Trial Court batok sa APO apil na ang lokal nga kagamhanan sa Naga ug lalawigan sa Sugbo ingon man usab ang Mines and Geosciences Bureau dinhi sa Central Visayas. Sila maoy gibasol sa pamilya sa mga namatay nga maoy hinungdan sa dakong trahedya.

Ang pagpasagad kuno sa APO ug sa mga ahensiya sa gobiyerno maoy mabasol sa dakong katalagman nga miigo sa ilang banay. Ang mga residente gipaluyohan ni Atty. Benjamin Cabrido, usa sa mga nabantog nga environmental lawyer sa Sugbo.

Si Cabrido gikutlo sa report nga ang iyang pagpasaka og kaso alang kuno sa mosunod pa nga mga henerasyon.

Sa miaging Biyernes miluwat na ang korte og 72 oras nga temporary environmental protection order nga nagdili sa quarry operations diha sa Naga.

Di malalis ang dakong kadaot nga nahitabo ngadto sa mga hingtungdan nga pamilya. Sakit ang mawad-an og mahal sa kinabuhi. Natural sab nga mangita og hustisya sa ilang gidangatan.

Apan husto si Mayor Christine Chiong sa Naga nga angayang magbantay ang mga biktima kay tingali baya og duna lay mga mapahimuslanon nga buot mosakay sa ilang kahimtang alang sa kaugalingon nga interest.

Busa angayang suknaon ang 39 ka mga nipirma sa reklamo kun ila ba gyud nga kabubot-on ang pagpasaka og kaso o duna lay mga tawo nga naggalgal nila aron paghimo niini?

Hinaut nga wala magpagamit ang mga biktima.