Rito sa paglubong

Dili baya ko supak ning magkuha og documentation panahon sa lubong o sa misa ang nakadaut lang mao nga daghan ang niabusar niini. Imbes mag-ampo ug mohilom magpasopaso hinuon ug ibansiwag ang ilang mga tablet ingon man ang ilang mga sapyot nga sampot. Nahimong kataw-anan usahay ang kinabuhi sa namatay kay imbes solemni nahimong saba gumikan sa mga pakapin nga wala na kinahanglana. Nahinumdom nuon ko ni Morrie sa libro nga Tuesdays with Morrie nga sinuwat ni Mitch Albom. Buot ni Morrie nga sa katapusang gutlo himoong pribado ang iyang kamatayon. Sa ato pa, way daghang kisaw, way daghang saba. Kay mag-unsa man ang daghang documentation kon sa buhi pa ang tawo daw idlas ang panumdoman sa iyang mga kabanay nga nahinumdom lang niya sa dihang patay na siya kay may income na siyang mahatag gumikan sa mga limos ug tong sa panahon nga siya gibilaran pa?