“Santo Rodrigo”
Hayan mapukaw na sab ang nahilom na unta nga panagbingkil tali ni Presidente Rodrigo Duterte ug sa mga opisyal sa simbahang Katoliko human sa komedya niini nga posibleng nakainsulto sa pagtuo sa mga sakop sa simbahan.
Niadtong Enero 1, gibugal-bugalan ni Duterte ang pagsaulog sa simbahang Katoliko sa kalagkalag. Matud niya nga angayang hunongon na ang paghatag og pasidungog sa mga santos nga iyang gihulagway nga mga “palahubog.” Iyang gisugyot nga ang angayang buhaton mao ang pagkuha sa iyang hulagway og maoy pasidunggan isip “Santo Rodrigo.”
Ang mga nakaila sa presidente nasayod nga komedya lang ang iyang pamahayag. Apan sensitibo ang maong isyu nga dili angayang himuon nga tinubdan sa komedya.
Ang pagpili sa imong relihiyon ug ang pagtuman niini usa sa mga katungod nga gipanalipdan sa atong batakang balaud. Labaw ni bisan kinsa, ang presidente maoy angayang mohatag og sumbanan pagtahod niini.
Inay bugal-bugalan, angayang tahuron ni Presidente Duterte kon unsa man ang pagtuo ug tradisyon sa mga Katoliko.
* * *
Malampuson ang pagtimaan sa Adlaw sa mga Santos ug Adlaw sa mga Kalag dinhi sa Sugbo. Malinawon ug way dagkong mga panghitabo nga nakabalda sa kalihukan. Salamat sa kamabinantayon sa kapolisan ug sa tanang grupo nga nitabang sa pagpatuman sa kahapsay ug kalinaw.
Bisan gawas sa mga sam-ang, walay mga panghitabo nga nakatugaw sa kalinaw sa Sugbo tungod sa epektibo nga deployment sa pwersa sa kapolisan. Angayang daygon sila si Sr. Supt. Debold Sinas, ang hepe sa kapolisan sa rehiyo, ug si Sr. Supt. Royina Garma, ang hepe sa kapolisan dinhi sa dakbayan tungod sa maong kalampusan.
Nabatyagan sa publiko ang padayong presensiya sa kapolisan diha sa kadalanan bisan layo sa mga menteryo tungod kay wala kuhaa ang mga gidestino isip beat patrols. Saludo ko sa liderato ni Garma tungod kay sukad karon pa ko kabantay nga napitol ang polis ug di na mahanaw sa dapit diin sila gidestino.
Kadaghan na ni gisuwayan niadto sa mga nanlabay’ng kumander apan maayo lang sa sinugdanan.
- Latest
