Mojito ug ang mga arketikto

Wa lang tuyoa nga akong gikahinabi ang usa sa mga arkitekto nga dunay pagtamod sa Japanese Architecture labina kang Tanji, Ando ug uban pa.

Daghan mi og naabtan sa among kukabildo apan sa kaulahian niingon siya nga usahay ang tawo nahimong mapul-an man dayon kay ang bisan unsang tinukod mahimo man dayong gub-on kon pagbuot na sa tagdumala ug pagbuot sa bahanding kalibutanon.

Sa laktod mahimong gub-on ang giisip nga heritage labina kon adunay dakong panginahanglan sa panalapi. Nawala ang sense of history, ug labaw na nga nawala ang tinguha nga mamahimong mopatunhay sa bisan unsang nasugdan kaniadto.

Buot natong wad-on ang atong kalambigitan sa karaang panahon aron mohimo kita og mga simbolo sa atong panahon. Nahinumdom nuon ko ni Pugin sa kakaraanan kon nganong dili gyud siya motukod og mga simbahan nga pinasikad sa Arkitekturang Greyego kay alang niya nga ingon nga Kristohanon kinahanglang mohimo kita og balay alampoanan nga sibo sa atong kahimtang ug dili pinasikad sa kahimtang sa uban.

Kini tungod kay mamahimo kitang kopya lamang sa atong mga giidolo. Human mainom ang katapusang mojito niingon siya : “nice meeting you!” tingali relihiyoso kuno ko apan ako siyang giingnan nga dili ko arkitekto mahigugmaon lang ko sa arte sa paggambalay og mga estraktura nga dunay kalambigitan sa atong kahimtang ingon nga mga mamugnaong tawo.