EDITORYAL - Martial Law sa Mindanao

Adunay umaabot nga diskusyon kon lugwayan pa ang martial law didto sa Mindanao nunot sa sagol-sagol nga mga baruganan sa mga hingtungdang mga ahensya sa gobiyerno ug hut-on sa katilingban.

Ang martial law sa Mindanao gideklarar ni Pres. Duterte tungod sa pagatake sa ISIS-Maute terror group sa Marawi City.

Ang deklarasyon makiangayon lamang tungod sa maong hulga nga diin ang giyera milanat gyud og upat ka bulan nga nakaapektar sa tanang mga nagpuyo sa maong siyudad ug sa mga kasikbit nga mga dapit.

Ang martial law gikaintapan sa mga dili gusto niini. Kay nabalaka silang moabusar ang militar ug kapolisan sa ilang gahom ug mayatakan ang batakang tawhanong katungod sa mga tawo nga ilaha unyang mabiktima.

Husto ang maong kabalaka, makiangayon usab ang ilang basehan aron paminawon kining mga supak sa martial law. Apan dili husto nga tungod lamang nila ibalewala ang kabubut-on sa mas kinabag-an. Ang Mindanao bikilonon kaayo ang seguridad tungod sa presensya sa mga armadong grupo, rebelde, terorista ug uban pa nga nagsusamang angkla nga nagpugong sa kalamboan didto.

Angay himoan og seryusong pagtuon kon angayan pa bang lugwayan ang martial law didto, apan mas makatarunganon kon ang mga katawhan didto sa Mindanao maoy padesisyonon.

Kon ang martial law nakatabang og dako ug mas daghan ang nakabenepisyo tungod sa kalinaw ug seguridad nga natagamtaman, nganong di man padayunon?

Ang importante niini nga malinawon ug may pagtahod ang katawhan sa balaod. Basta siguraduhon lang gyud sa gobiyerno nga ang pwersa niini dili moabusar ug manaugdaog sa mga tawo didto samtang naay martial law, wala tingali rason aron mabalaka ang mga tawo.

Karong sunod tuig himuon ang mid-term elections ug ang Mindanao usa sa adunay labing daghang hot spots panahon sa piniliay.

Angay tingaling balikan og lantaw ang nakalabay nga barangay elections kon maayo ba ang resulta sa eleksyon didto sa Mindanao samtang gipatuman ang martial law aron kakuhaan og leksyon.