Mas gipalabi ang kangitngit

Tungod kay hapit naman ang adlaw sa mga minatay aduna na usay mga pauso karon nga kalingawan pinaagi sa pagpanghadlok.

Sama nalang niining horror booth sa bisan asa nga mall sa Metro Cebu diin pamaagi sa pag dani sa mga customer.

Gawas niini mao nga mokita sila mismo tungod kay maglinya man usab ang mga tumatan aw.

Sa usa ka mall sa Lapu-Lapu pastilan ka taas sa linya halos mga batan-on ang gusto gyud mosulod sa horror booth.

Inig naa na sa ganghaan daw makuyapan na sa kahadlok samot na kon atoa na sa sulod.

Ilabi na kon kuhiton ug hadlaon na sa mga nilalang sa kangitngit, sama sa zombie, madre nga si Valak ug aduna pay mga yawa sa sulod.

Pun- an pa sa musika nga hilabihan ka  makapanglimbawot sa balhibo.

Ang uban makuyapan gani tungod sa kahadlok apan nganong tuyoan man?

Seguro alang sa uban kalingawan ang ingon niini nga talanawon, apan duna baya kini epekto sa panghunahuna sa tawo ilabi na sa mga bata.

Delikado kini sa possession o kadtong pagsulod sa dautang espirito ilabi na sa mga huyang og spirituality.

Makapangutana lang ko nganong dugokan ug dagsaan ang kalingawan nga murag naghimaya sa lord of darkness?

Kon kalihokan na gani sa simbahan gamay ra gyud ang manambong kon dili pugson sa mga ginikanan o magtutudlo dili gyud motambong.

Ok ra man seguro mangita og kalingawan basta dili mabutang sa peligro ang hunahuna ilabi na sa mga bata.

Makaingon ko nga mas palabihon pa sa uban ang pagsulod sa kahadlok kay malingaw kuno sila apan mas malingaw man seguro kon walay bation nga kahadlok.

Karong adlawa kay Biyernes man mas maayo nga maglinya sa Basilica del Sto. Niño aron mag novena.