Kinsay nag-ingon nga wa tay lana
Usa sa gibalikbalik nga panagang ni Presidente Rodrigo Duterte nganong way nahimo ang iyang pamunoan sa paspas nga pagburot sa inflation rate karong tuiga mao nga, lahi sa atong silingan nga adunahan nga mga nasud, way lana ang Pilipinas.
Ambot nganong way nakahunghong niya, o tingali may nakasulti na apan wa lang niya paminawa, nga di tinuod nga way lana ang Pilipinas ug nga daghan tang silingan nga mga nasud nga mas malambuon ang ekonomiya bisan, lahi nato, wa gyud silay nakit-an nga bisan usa na lang ka tulo sa lana.
* * *
Hinaot nga may makaangkon og kaisog sa pagpakita sa presidente sa labing bag-o nga binuwan nga taho sa Department of Energy (DOE) sa produksiyon sa lana sa Pilipinas gikan labing menos lima ka tinubdan, apil nang Alegria sa habagatan kasadpang Sugbo.
Gikan sa Enero hangtod sa Septiyembre karong tuiga, nitaho ang DOE nga ang Pilipinas may kapin sa upat ka milyon ka baril sa lana (4,020,271 ka baril ang tukmang ihap): Kapin sa tulo ka milyon gikan sa Malampaya; samtang nahibilin gikan sa Alegria, Nido, Matinloc ug Galoc.
* * *
Ang Alegria Oil Field nga maoy labing bag-ong tinubdan sa lana nakasugod sa iyang operasyon niadto lang Abril karong tuiga, kanus-a nakatampo og 438 ka baril sa nasudnong produksiyon.
Hangtod sa pagtapos sa Septiyembre, ang Alegria nakahimo na 1,857 ka baril sa lana:
Ni-average og 6.83 ka baril matag adlaw o 206 ka baril matag buwan.
Masaligon ang DOE nga molambo ang inadlawng produksiyon sa Alegria ngadto sa 360 ka baril.
* * *
Lima sa labing adunahang mga silingan sa Pilipinas nga tinuod gyud nga way lana mao ang Singapore, South Korea, Hong Kong, Macau ug Guam. Ug ilang inflation rates mas ubos kay sa Pilipinas.
Hinaot nga may makapasabot ni Presidente Duterte nga (1) niburot ang inflation rate sa Pilipinas, bisan duna tay lana, tungod sa kasaypanan sa iyang pamunoan, nag-una sa listahan ang iyang Tax Reform for Acceleration and Inclusion (TRAIN) Law; ug nga (2) nilambo ang atong mga silingan, bisan wa silay lana, kay gitarung pagduma ang ilang ekonomiya ug wa magsige og mugna og abat-abat nga wa diha.
* * *
- Latest
