EDITORYAL - Mao diay daghang shabu

Nagkainit na og maayo kining kontrobersiya may labot sa pagpasulod sa giingong multi-billion peso nga shabu diha sa Bureau of Customs kay hasta ang Malacañang pinaagi ni Pres. Duterte mitingog na bahin niini.

Mao tingali kini ang rason niining makapahibulong kaayo nga padayong pagdaghan sa ilegal nga drugas bisan pa sa higpit ang war on drugs sa gobiyerno.

Sukad nga gisugdan ang war on drugs, bilyones pesos na ka mga ilegal nga drugas ang nasakmit, liboan na ang mga napatay ug liboan na usab ang mga nadakpang durugista. Ang saad ni Duterte atol palang sa iyang pagpangampanya nga iyang mapuo ang ilegal nga drugas sa nasud sud lang sa tulo ka tuig nahimo na karong kapin duha ka tuig ug wala pay kasigurohan kon mapuo kini.

Kini gumikan sa posibilidad nga padayong kurapsyon sa mga dagkong opisyales sa gobiyerno nga gitahasan untang mokooperar sa kampanya.

Sumala pa nga ang upat ka magnetic lifters nga nadiskubrehan didto sa Cavite niadtong Agosto, giingong gisudlan og gibanabanang 1.6 toneladang shabu ug mokantidad og P11 Bilyones.

Niining gidaghanon, pila na kaha ka kinabuhi ang mangaliso o nangaliso na ang pangutok tungod sa paggamit niini?

Sa pagkakaron, ang House of Representatives’ committee on dangerous drugs and committee on good governance ingon man ang Senado naghimo og inquiry bahin niining shipments sa mga shabu dinhi sa nasud.

Ang padayong paglusot sa ilegal nga drugas nganhi sa Pilipinas nagpakita lang sa posibilidad nga dugay na kining nahitabo kaniadto pa dili lang sa panahon sa kasamtangang administrasyon.

Mag-unsa nalang ang mga law enforcement agencies nga front liners sa war on drugs kon ang mismong magbalantay sa mga pultahan pasulod sa nasud nagmika o nakigkunsabo sa mga ilegalista?

Kaning mga inquiries nga gihimo sa Kongreso maayo unta og magbunga og maayo nga epektibong makapahunong niining shipments sa drugas ug dili lang pa-pogi points sa mga politiko.