EDITORYAL - Bidli na paminawon

Pwerte kakusog sa panawagan nga makabaton ang Pilipinas og anti-dynasty law, aron did-an na kining pagbalik-balik sa mga managkaliwat pagdagan og elective position sa gobiyerno. 

Apan dili gyud tingali ganahan sa maong ideya ang mga politiko kay wa man sukad napasar nga balaod. Sukad pa sa una, sum-ol ug bidli na kaayo kining pagbalik-balik sa mga apelyedo sa mga politiko matag eleksyon. Apan aduna man say mapili nga tarong kay tinud-anay nga miserbisyo.

Adunay uban nga nidagan lang kay ganahan sila og posisyon ug gahom ug dili sila lisod padag-on kay ilado naman ilang pamilya sa politika.

Usa sa ilang mga taktika kining pagpalit og balay ug yuta sa laing lungsod aron didto mokandidato.

Mao ni rason nga adunay mga probinsya sa Pilipinas nga ang local nga opisyales sa mga lungsod pulos managparyente. Kuwang nalang ilisan nila sa ilang apelyedo ang pangalan sa ilang probinsya.

Adunay uban nga gusto gyung mahakop ang tanang posisyon pinaagi sa pagdagan sa tanang mga miyembro sa ilang pamilya.

Usahay, aron makasigurong makadaog bisan sa gamay lang nga labaw magtigi sila sa usa lamang ka posisyon aron mabahin ang boto kon adunay laing kandidato. Paniguro kini  kay bisan kinsa pa nila ang modaog magdala man gihapon sa ilang apelyedo.

Wala nay bag-o kay kondili magpuli-puli og dagan sa parehong posisyon, ang uban modagan sa laing posisyon ang mga political clans.

Adunay mga bag-ong nawong ug makamao apan kuwang sa makinarya ug eksperiyensya.           

Ang mga ingon niini nga senaryo maoy hilom nga gikalagotan sa mga tawo. Apan kutob ra pud bagulbol ang uban kay ini og eleksyon modawat man pud sila og bayad bugti sa ilang sagradong boto.

Karong mga panahona ang mga botante maoy gamhanan ug dili unta usikan ang kabalaan sa ilang boto pagpili sa angayan.