EDITORYAL - Malata ug di malata

Ang nakalabay nga 2016 elections nakapapukaw sa mga Pilipino tungod sa bag-ong matang ug kalibre sa mga nakadaog ug nakalingkod sa pwesto.

Dili tungod kay pulos mga bagito ang mga nakadaog kondili ang pag-usab sa mga taras bisan kadtong mga beteranong politiko nga nakadaog.

Tungod kini sa kahigpit ni Pres. Duterte, kay bisan sila nakat-on pagkinto. Anugon lang kay wala kaayo makatabang ang ilang pagkinto sa pagalibyo sa kinabuhi sa mga tawo karon gumikan sa wala ug tuong krisis.

Swerte kadtong mga nakasakay sa popularidad ni Pres. Duterte sa 2016 kay naapil gyud sila sa kabig ug nakadaog.

Dunay uban nga nakadaog gumikan na sa uban pang rason, mahimong tungod sa maayo nilang panerbisyo o sa uban pang paagi.

Unsa kahay mapaabot karong mid-term elections? Mosalir kaha ang popularidad ni Duterte niining ilang mga pangbato karong eleksyona?

Ilabi na nga ang mga tawo naglisod gumikan sa pagsaka na sa presyo sa tanang palaliton?

Kinsa kahay mopatigbabaw karong eleksyona, ang oposisyon o ang administrasyon? Ang dagan sa panggobiyerno sa mosunod nga tulo ka tuig magagad sa gidaghanon sa nakadaog nga sakop sa matag grupo.

Busa dako og papel ang katawhan nga maimpluwensyahan ang direksyon sa nasud sa kataposang tulo ka tuig sa termino ni Duterte.

Kinahanglang magmatngon ang mga botante sa ilang pagpili og kandidato ug mogamit gyud sa ilang utok ug konsensya ug dili tungod lang kay sikat o ba kaha gipalit ilang boto. Magbantay kon kinsa nga grupo ang nagsige og pahumot sa kaugalingon ug kinsa kadtong kusog manaot sa ilang mga kaatbang.

Maayong pilion mao kadtong kandidato nga dili sa partido o kaugalingong interes ang kasing-kasing kondili kadtong tinud-anay nga naghunahuna sa katawhan.

Sa pagkatinuod pipila lamang ka lugas ang tarong, ang kadaghanan way mapili kay pulos silang tanan mga malata ug dili malata.