EDITORYAL - Abusadong motorista

Ang kaluwasan sa mga motorista ug mga sumasakay lakip na ang mga tawong lumalabay lang sa kadalanan tulobagon sa tanan. Mao kini ang rason kon nganong adunay mga nagkalain-laing mga traffic laws.

Apan unsaon man kon ang mga drayber mga abusado, bentahoso, way disiplina, way pagpakabana sa uban ug uban pang pagkawalay respeto sa balaod sa trapiko?

Mao kini ang hinungdan kon nganong dunay mga traffic enforcers sa Land Transportation Office inabagan usab sa mga local nga traffic enforcers sa mga local government units.

Apan tungod sa kagamay lang sa mga sakop sa LTO nga aktwal nga manakop diha sa kadalanan mitaas ang sungay sa mga abusadong drayber.

Kini tungod kay nagapos ang mga kamot sa mga local traffic enforcers kay wala naman sila kuhaang deputies sa LTO hinungdan nga kutob na lang sila sa pagsitar ug pag-isyu og citation tickets sa mga abusadong mga drayber ug dili makakompiska og lisensya.

Ang citation tickets mas gamay lang og multa ug dili makuha ilang lisensya ug pabayaran lang ang multa sa traffic violations diha sa City Treasurer’s Office.

Itandi sa temporary operators permit (TOP) nga maoy iisyu sa LTO ug mga LTO deputized agents mas dakog multa ug kompiskahon pa gyud ilang lisensya ug di sila mabalik og maneho kon wa niini.

Karon ang LGUs ilabi na ang mga dagkong siyudad sama sa Dakbayan sa Sugbo, naglaraw pagpasar og ordinansa nga magtugot sa mga traffic enforcers nga makaembargo og lisensya bisan og wala silay deputation sa LTO.

Kay pagkakaron, nagpakabuta, bungol ra man sila anang mga signages sa dalan kay nagsalig ra man nga panagsa rang dunay taga LTO nga manakop, samtang ang traffic enforcers di man makaembargo sa ilang lisensya.

Kon mahinayon kini ug walay legal nga mga kwestyon, ayha napud tingali makaklaro gamit ilang mga mata ug motuman ang mga drayber sa mga traffic signs diha sa kadalanan.