Ang di buhaton inighuman og kaon (2)

Angay kita nga masayod, nga ang tukmang oras sa pagkaon og prutas, mao kana’ng wala pay sulod ang tiyan, aron kahatagan og higayon nga makatuhop sa lawas ang tanang mga sustansya niini, maingon man ang mga fibers nga mopalangan sa proseso sa asukar nga dili kini magpundo direkta sa dugo.

* Ang matulog dayon – ini’g human og kaon nga mohigda ug matulog, ang pagtunaw sa kinaon mapugos nga langanon nga tingbon na lang sa gabii ang trabaho sa paghilis, nga kalagmitan dili maato nga magpundo lang kini’g dugay sa tinai nga mahimong toksik  nga makahilo na sa ginhawaan, nga maapektohan sa kadaut ang tanang mga sistima sa lawas.

Busa, palabya ang pipila ka oras, gikan sa paghuman og kaon, una matulog aron paglikay sa taas nga risgo sa atake sa presyon ug sa kasingkasing.

* Ang maligo – Gikinahanglan kon maligo man, maligo una nga ighuman maoy husto nga higayon sa pagkaon. Kay sa ini’g human og kaon maligo dayon, delikado kini kay matingob ang dagayday sa presyur sa dugo paingon sa batiis ug sa kamot, nga momenus ang presyur sa dugo sa tiyan o ginhawaan.

Niini mahimong komplikado nga dili mabalanse ang trabaho sa lawas, ilabi na sa tiyan nga magsakit kay wala matarong ang sistema sa digesyon.

* Ang pag-inom og tsa nga greentea – Makatabang ang green tea sa pagtunaw sa kinaon, apan nagkinahanglan nga hulaton una ang pipila ka oras gikan sa paghuman og kaon.

Kay kon moinom dayon ini ini’g human kaon, madisturbo ang pagtuhop sa iron, nga kalagmitan maoy sagad nga hinungdan sa pagka-anemiya nga nangluspad lang, nga niresulta sa way gana mokaon, manakit ang dughan, malipong, mamugnaw tiil ug kamot, luyahon nga perming kapoyon.