Mas hawod pa sa balaod
Di pa igo nga gibugalbugalan ug hingpit nga gisalikway ang ilang mga pakisusi sa gidudahang laktod nga mga pagpamatay sa kampanya batok sa ilegal nga drugas, giawhag pa gyud ang Commission on Human Rights (CHR) sa paghunong na paglalis ni Presidente Rodrigo Duterte sa iyang gituohan nga mga pagpangyatak sa mga tawhanong katungod.
Ang awhag giluwatan ni Senador Gringo Honasan sa pagtuki sa gisugyot nga budget sa CHR alang sa sunod tuig.
Bentaha na lang ni og diyutay sa pagsuway sa mga kongresista paglaslas sa budget sa CHR sa niaging tuig.
* * *
Gikabalak-an ni Honasan nga mosamot pagkadaut ang kadungganan sa Pilipinas sa mga mata sa ubang kanasuran sa kalibotan kon magsige ang kadagkoan sa CHR pakiglalis ni Presidente Duterte sa lahi niyang panglantaw nga way katungod ang mga nahilambigit sa ilegal nga drugas.
Para ni Honasan mas makauuwaw alang sa nasud ang pagpadayon sa lalis mahitungod sa tawhanong katungod kay sa aktuwal nga laktod nga pagpangluba sa gidudahang mga durugista sa kapin na sa duha ka tuig nga kampanya sa presidente nga nakaangin sa mga bata ug ubang mga inosente.
* * *
Gawas nga gipasanginlan ang kadagkoan sa CHR nga kakunsabo sa drug lords, gihimo pa gyud niyang inutil ang buhatan pinaagi sa pagdili sa kapolisan paghatag sa bisan unsang dokumento sa ilang mga operasyon sa drugas ngadto sa mga imbestigador sa CHR. Mao nga ang CHR nga nihit nang daan og pundo ug mga kawani kutob ra sa pag-awhag sa kapolisan, nga wa mohatag og bisan unsang tabang, sa ilang mga imbestigasyon sa mga reklamo sa mga tagtungod sa giingon nga mga biktima sa extrajudicial killings.
* * *
Usa sa labing nabantang nga paugat sa kapolisan mao ang pagdumili pagpa-imbestigar sa ilang mga sakop nga gilambigit sa kamatayon sa kuwatro anyos nga si Skyler Abatayo sa Bato, Ermita, Cebu City.
Gawas sa CHR, nagsusi sab sa kaso ang National Bureau of Investigation (NBI).
Nga nakakita og sukaranan pagkiha sa tulo ka polis bisan sa pagdumili sa Cebu City Police Office (CCPO) pagpaatubang nila sa imbestigasyon.
Inay mangayo og pasaylo sa pagpasundayag nga mas hawod sila kay sa balaod, gipasanginlan sa CCPO ang NBI nga niunay sa ilang mga sakop.
* * *
- Latest
