Tukma ang pagpatay

Gidayeg nako ang kapolisan sa Dakbayan sa Lapu-Lapu nga mitodas sa pito ka armadong tawo nga giingong responsable sa mga krimen nga nanghitabo diha sa ilang siyudad, apil ang pagpayuhot og gidiling drugas.

Para kanako, tukma lang ang ilang gihimo kay diha nga gironda ang ilang gipuy-an, nanukol man. Kon wala pa sila manukol, dili unta mapugos ang kapolisan sa paggamit sa ilang mga armas.

Ingon niini ang angay’ng himoon sa mga polis nga kinahanglang dili mahadlok mogamit sa ilang armas kon mosukol ang ilang mga dakponon.

Dili ikalimod nga daghan sab nga mga polis nga mahadlok mogamit sa ilang mga pusil kay basin og magkakaso sila.

Ang pagkapulis gigamit ra nila isip panginabuhi, trabaho, ug wala sa ilang hunahuna nga misulod sila sa pagkapolis aron nga makatabang sa kagamhanan pagpatuman sa balaod.

Usbon nako, saludo ko kaninyong mga polis sa Lapu-Lapu nga gipangulohan sa akong amigo nga si Senior Supt. Lemuel Obon. Dugay na nga wala kami magkakita.

* * *

Daghan ko og mga report nga nadawat, naglambigit og mga hantak, kasaba sa pagpatukar og videoke sa ilang mga silingan, ug uban pa. Mohangyo lang ko nga didto lang kana ireklamo sa inyong mga opisyal sa barangay kay kon tagdon nato kana, mahurot ang atong luna nga maghisgot og gagmay kaayong mga isyu.

Ang gusto nako nga i-report ninyo mao ang mga dagkong inpormasyon kabahin sa pagkalambigit ba pananglit sa inyong mga opisyal, mga polis ba, sa sindikato sa mga tigpayuhot og ginadiling drugas, illegal gambling ug ubang dinagko nga kaso.

Pero daghan ko og report nga nadawat nga igo lang moingon nga sa ilang lugar, daghan gihapong shabu, ingon man duna gihapo’y ilegal nga drugas. Wala gyud kini magtug-an kinsa ang mga tawo nga nalambigit sa maong mga binuang. Ang uban, igo lang magtug-an sa barangay, nga wala magtug-an unsa nga sityo.

Sige, ayoha ang inyong pag-report kanako. Unya, himoa ang pag-report nga dili kamo mangayo’g bayad.

Bisan og ipasangil lang ninyo nga pamilete, ayaw kana og buhata. May mihimo man gud niini kanako nga nangayo og kwarta, pastilan. Ang inyong mga report, i-text sa 0943-0766611.

* * *

Diriyot gyud ko madisgrasya kagahapon diha nga dunay drayber nga mikalit lang pag-backing sa karsada nga adunay “double solid yellow line” sa tungasan nga bahin paingon sa Marco Polo Hotel.

Edaran na man unta ang maong drayber apan ignorante gihapon sa balaod sa trapiko.

Kon nagkabag-id pa ang among mga sakyanan, wala na’y daghan pa nga imbestigasyon, makita na dayon kinsa ang sad-an.