Kagahapon ug karon

Pipila ka senior citizen, akong gikahinabi. Bisa’g unsa na lang ang among giestoryahan apan ang politika mao gayuy mipatigbabaw sa among gikulokabildohan nga usahay mosantop sa panaglalis kay lagi nagkasungi man ang among mga baruganan ug association sa politika.

Ug sama sa relihiyon, ang among pagbayloay sa hunahuna ug opinyon wa gyud mosangko sa atong maingon nga katin-awan ug katinoan kinsa kanamo ang husto, kinsa ang sayop. Gubot pa’s lukot, matud pa.

Apan usa sa among nahisgutan nga medyo nagkauyon ang among mga hunahuna mao ang mahitungod sa atong kahimtang kagahapon ug karon. Ang mga kinaiya ug mga batasan sa ato karong mga batan-on ug sa mga batan-on sa among panahon.

Of course, nasentro sa among pagbayloay sa hunahuna ang GMRC kon Good Manners & Right Conduct nga kanhi gitudlo sa mga tunghaan nga karon wala na kini ilakip sa curriculum sa mga tunghaang publiko. 

Nag-una sa among kabalaka mao kining nagkahanaw o nagkawala na ang pagkamatinahuron kasagaran sa ato karong mga batan-onan, kining ilang gitawag nga mga millennials.

Hinumduman nga sa among panahon, nitahud kami, una sa tanan, sa among mga ginikanan ug katigulangan. Ingon man, daku ang among pagtahud sa mga magtutudlo, sa kapolisan ug sa mga persons in authority.

“Bii Noy, Bii Nang; Palihug lang; Salamat Noy, Salamat Nang,” sagad namong malitok sa among ikahibalag nga katigulangan ug ubang mga elders.  

Ug kaming kalalaken-an, daku kaayo ang among pagrespetar ngadto sa kababayen-an, ma-tigulang o ma-batan-on.

Hinumdum ko nga kon mamisita kami sa buot namong panguyaban, maligo gyud una mi, mag-ilis, sinaw ang sapatos, hinapay ang buhok (magsinaw-sinaw pa sa pomada), limpyo ang mga kuko, ug of course sigurohon namo ang pagpang-toothbrush.

Ingon niini ang among pagrespeto sa kababayen-an kanhi. Sa kadalanan, kon kuyog namo ang babaye (young and old), o usa ka gamay’ng bata, dili namo sila pasagdan nga mahimutang sa danger side. Wa na ni karon.

Inigsimba namo, mag-ilis gyud mi, ang Sunday’s best maoy among isul-ob kay lagi  moatubang gud ta sa Ginoo. Karon, mag-shorts na lang, mag-sandal, mura’g motambong og tigbakay, ang mga babaye hapit na lang maghubo.

Of course, dili ingon niini ang tanang manimbahay. Generally, daku ang atong pagtahud sa Simbahan, sa balay sa Dios.  Kini ug daghan pa ang among nakita nga mga kausaban ug kalainan sa atong mga kinaiya ug mga batasan kaniadto ug karon.