Anino
Kanunay’ng giinsister sa mga opisyal sa Malakanyang ug ni Presidente Rodrigo Duterte mismo nga nakigkonsabo ang oposisyon sa komunistang New People’s Army aron siya palagputon sa katungdanan.
Ang plano pagpalagpot ni Duterte gibansagan og “Operation Red October”.
Sa pakigpulong ni Duterte didto sa Davao City iyang gitug-an nga dunay mga sundawo nga nakigkonsabo sa oposisyon alang sa maong plano.
Ang pasangil hinuon kusganong gihimakak sa mga lider sa Liberal Party labi pa ni Bise Presidente Leni Robredo nga gidudahang dunay dakong papel sa plano sanglit siya maoy mohulip og mapalagpot si Duterte.
Apan kasaligan ba ang tinubdan sa Malakanyang niining maong plano?
Base sa mga balita, ang “Red October” nadiskubrehan pinaagi sa mga dokumento nga nakuha sa militar gikan sa mga sakop sa NPA human sa nahitabong engkwentro didto sa Bukidnon niadtong Pebrero sa niaging tuig.
Plano kuno sa mga rebelde nga pakusgan pa ang ilang mga lihok protesta pinaagi sa pagtigom og daghang tawo sa kadalanan aron pugson si Duterte nga mokanaug sa pwesto.
Kun mao ni ang gibasihan sa militar ug sa Malakanyang sa ilang pagpangugat karon wala silay kalainan sa tawo nga nahadlok sa iyang kaugalingong anino.
Anino sa bisan kinsang administrasyon ang mga protesta ug tinguha sa mga NPA nga lumpagon ang lihitimong gobiyerno tungod kay mao ni dugukan sa ilang kawsa.
Bisan kinsay maglingkod nga presidente anaa kanunay ang maong hulga, apan tinuod kaha nga nakigkonsabo ang oposisyon? Kini maoy dakong pangutana!
Dili kaha nga ang gibasihan sa Malakanyang paglambigit sa oposisyon sa giingon nga destabilization mao lang ang kaalingugngog ni Senador Antonio Trillanes IV?
Hangtud nga dunay klarong pruweba nga ikapakita ang militar ug Malakanyang sa papel sa oposisyon, magpabilin ang katahap nga ang pagpangugat sa administrasyon usa lang ka paagi pagkondisyon sa huna-huna sa publiko ug aron tabunan ang mas mahinungdanon ug importante nga isyu nga angayang hatagan og prayoridad sa gobyerno sama sa pagpangita og paagi unsaon nga maminusan ang impact sa inflation ngadto sa mga kabus.
* * *
- Latest
