Wa mamatay ang demokrasya
Sayop si Senador Antonio Trillanes IV. Wa mawagtang ang demokrasya sa Pilipinas dihang gipadakop siya sa korte tungod sa proklamasyon ni Presidente Rodrigo Duterte nga nagbasura sa iyang amnestiya pito ka tuig na ang nilabay. Buhi pa ang demokrasya. Apan seryuso nga naangol.
Nakapiyansa siya alang sa temporaryong kagawasan. Makaawhag siya sa korte sa Makati sa pagsubli sa iyang hukom. Maka-apura siya sa Korte Suprema sa pagsubli na sa legalidad sa Proclamation No. 572.
Apan unsa man katakos ang demokratikanhong mga institusyon pagsusi sa kamakiangayon sa labing gamhanang opisyal sa nasud?
* * *
Way problema si Presidente Duterte ni Senador Trillanes. Abunda ang iyang mga pasidaan apan nihit ang iyang mga ebidensiya.
Nakamatuod na sa makadaghang higayon sa iyang kaisog apan wa pa gyong kakita og paagi pagmatuod sa gipasangil nga mga krimen batok sa presidente ug sa mga sakop sa iyang pamilya.
Daghan uyamot og atraso si Trillanes sa institusyon sa militar aron makaangkon og lapad nga simpatiya gikan sa kasundalohan sa pait niyang kahimtang.
Di katabang sa kawsa ni Trillanes ang pagdoble sa presidente sa suholan sa kasundalohan ug kapolisan.
* * *
Apan ang labing dakong labad sa ulo sa presidente mao ang mga implikasyon sa iyang pag-apiki ni Trillanes ngadto sa susamang mga kaso nga naglambigit di lang sa iyang mga kaatbang kon dili sa labing suod sab niya nga mga alyado.
Kuwestiyunon ba sab niya ang ilang mga amnestiya? O pilion ra kinsa ang pailhon nga mapalihok niya ang kinatibuk-ang makinarya sa gobyerno batok ni bisan kinsa nga mangahas pagsukwahi niya?
* * *
Mao ni ang hinungdan nganong nagtakiang ang atong demokrasya.
Mao ni ang labing dakong hagit nga giatubang sa Korte Suprema ug ubang demokratikanhong mga institusyon sa nasud karon. Takos ba sila nga mobaraw sa labing taas nga opisyal sa gobyerno nga kumbinsido nga way makababag bisan unsay buhaton?
Nahitabo na ni sa una. Ang Korte Suprema, ang Kongreso, ang Armadong Kusog ug ubang mga institusyon nakigkonsabo og diktadura sa pagpangyatak sa tawhanong katungod ug paglungkab sa nasudnong katigayonan.
Ang hiniusang paglihok ra sa katawhan mao ang nakabaraw nila. Apan niabot gyod og usa ug tunga ka dekada ang ilang pag-agwanta.
* * *
- Latest
