Mga biktima sa giabusong bukid

Niadtong gamay pa ko, masinati pa sa tawo ang katahom sa kinaiyahan. Ang katin-aw sa dagat kang kansang mga gagmay’ng balod daw malipayong nakigdula sa mga hubong lawas nga nangaligo - mohasmag, mogakos ug mopadayon sa pagligid paingon sa unahan hangtod mapusgay pag-abot sa hamis nga lapyahan.

Usab, ang kabugnaw sa hangin nga mosapigad sa kalawasan matag higayon nga moagi ang gisakyang trak de pasaheroan kilid sa habog nga pangpang subay sa karsada sa Uling, Naga, ay, pagkalalim paminawon  ug kaanindot sud-ongon sa naglarayng kakahoyan sa masig ka daplin nga malabyan–daw imong nataak ang tinipigang kaanyag sa kinaiyahan.

Kaniadto, berde pa kaayo ang kabukiran sa Naga. Nagpunsisok pa ang mga dagkong kahoy nga namarog gikan sa ubos ngadto sa itaas, walay labot sa nanuybong kasagingan nga namungingi sa makaiibog nga mga bunga. Bisan sa kaudtohon, masinati gihapon sa mga pasahero ang kabugnaw nga giginhawa gikan sa naasoyng mga tanom sa bukid.

Apan karon, naupaw na ang kinatumyang bahin sa bukid. Nawala na ang kakamig sa kaudtohon nunot sa pagkahanaw sa kakahoyan. Unsaon, gisulong man ang maong dapit sa walay puangod nga mga dagkong makinariyas, gipamutol ang mga punoan, giungad ang mga gamot ug gipatag ang kabukiran bahala nag ang katumbas niini mao ang hingpit nga pagkapapas sa kinabuhi sa tanom ug sa tawo. Basta, mapuno lang sa salapi ang walay busganang bulsa sa kahangol.

Buntag sa Septiyembre 19,  daw busay sa Pagsanjan ang bukid sa Sitio Sindulan, Tinaan, Naga City.  Humok kaayong nangatumpag human maagii og kusog ulan nga walay hunonghunong  tibuok gabii hangtod natakdan ang nangliking pangpang, mora pog tubig nagbusagak, midahili-ambak ngadto sa ubos ug mitabon sa inosenteng kabalayan, diin, mga kinabuhing natanggong sa sulod igo na lang sa pagsinggit og panabang kay wala nay panahon sa pag-ikyas batok sa mapintas nga katalagman.

Ang Apo Land and Quarry Corporation murag si Ponsiyo Pilato, mipagawas dayon og pamahayag ngadto sa publiko pinaagi sa media, nga bisan tuod og may mining ug quarry  rights sila, pero wala kuno sila mohimog quarrying operation sa maong dapit nahitaboan.

Porbida, nanghinaw man dayon! Ngano kaha?  Tungod ba kay may mga biktima sa giabusong bukid?