Na peke ang kasal kaniadto!

Gipahigayon niadtong Martes ang mass weeding o Kasalang Bayan sa Dakbayan sa Lapu-Lapu diin 34 ka paresan ang nagpagapos sa kaminyoon diin sagad kanila dugay nang nagpuyo ug naa nay daghang mga anak.

Usa ka paresan adunay interesting kaayong estorya kinsa nakasal na kuno sila sulod sa 23 ka tuig.

Abi nako og renewal of vow lang ang ilang pagsalmot apan gibutyag nila nga fake diay ang una nilang kaminyoon.

Gikasal sila sa usa ka simbahan sa relihiyon nga nahisakop sila sa tinguha nga aduna kunoy blessing ang ilang panag-uban.

Apan human sa 23 ka tuig nasuta nila nga fake diay ang ilang kasal diin natino nga walay record sa Philippine Statistics Authority.

Nasayran kini nila dihang naghikay sa papeles ang misis aron unta mo-abroad.

Ang nahitabo sa magtiayon dili layo mahitabo usab sa uban busa seguraduhon gyud nga nasubmiter sa hingtungdang ahensya ang mga papeles.

Sa mga tawong pilosopo mas maayo nga dili magpakasal kay kon dili magkasabot dili hasol kon magkabulag.

Apan sa mga tawo nga dunay tim-os nga pagbati mahinungdanon kaayo ang kasal tungod ug alang sa mga anak.

Busa dako kaayong tabang sa mga tawo kining pagpasiugda og mass wedding.

Sa Dakbayan sa Lapu-Lapu kadtong mga sakop sa Pantawid Program sa DSWD ang nakapahimulos sa Kasalang Bayan.

Libre ang tanan lakip na ang kumbira diin ang gihimo sa mga couples igo na lang mipaso sa altar sa kaminyoon.

Hinaut unta nga dili lang kutob sa pagpirma sa marriage contract kon dili ipadayon nila ang pagpalipang sa relasyon sa pamilya gamit ang pundasyon sa gugma.