Biktima sa intriga
Duha na kahigayon nga gikastigo ni Presidente Rodrigo Duterte si Mayor Tomas Osmeña tungod sa pasangil nga wala mosuporta ang dakbayan sa kapolisan.
Unang higayon nga gilampornas ni Duterte si Osmeña ug gibaharan pa nga iyang tamparoson niadtong pagduaw niini sa Dakbayan sa Mandaue atol sa Charter Day Celebration. Ikaduha niadto lang miaging semana atol sa briefing sa epekto sa bagyong Ompong didto sa Laoag.
Gipunayan sa presidente og balikbalik ang wala kuno pagsuporta ni Osmeña sa kapolisan ug ang labing awahing insidente diin gipabuhian sa mayor ang tulo ka dinakpan sa pagpamaligya og refilled butane canisters.
Sa pasangil nga way suporta ang dakbayan sa kapolisan, atong susihon unsa kini ka tinuod. Base sa record sa General Services Office sa dakbayan dunay 44 ka motorsiklo nga gihatag ang Siyudad sa Sugbo ngadto sa kapolisan ug 45 ka patrol cars nga ang tanan mokantidad og kapin sa P48 milyones. Ang dakbayan sab maoy nagbayad sa gasolina ug krudo niini. Sukad niadtong Enero hangtud karon, 71,680 litros na nga krudo nga mobalor og P2,989,298 ang nahatag sa dakbayan ngadto sa kapolisan ug 33,902.80 litros nga dunay balor nga P1,761,815.48.
Ang dakbayan sab maoy padayong nagbayad sa mga telepono sa police stations, tubig, ug kuryente. Sigun sa record ang dakbayan migasto na og P337,425.59 sa telepono sukad niadtong Enero; P18,942.32 sa tubig; ug P343,107.45 sa kuryente.
Duna say 246 ka handheld radios ug 24 ka base radios nga gihatag ang dakbayan ngadto sa kapolisan. Dunay 389 ka armas nga naglakip sa shotgun, handgun, ug armalite rifle. Unsa man nga tabang ang gipasabot sa presidente nga wala ihatag sa dakbayan?
Sa akong tan-aw nabiktima si Osmeña sa intriga sa iyang mga kontra nga suod sa presidente. Tingali manlipaghong si Duterte sa kauwaw sa iyang gihimo kun masayod siya sa tanang tabang nga gihatag sa dakbayan ngadto sa kapolisan.
Mismo ang hepe sa kapolisan sa dakbayan nga si Senior Supt. Royina Garma miangkon sa dakong tabang nga gihatag sa dakbayan kanila. Sa gihimo ni Osmeña nga pagpabuhi sa tulo ka dinakpan, way lalis sayop ang mayor apan mas dako og tulubagon ang kapolisan nga mibuhi sa ilang mga dinakpan.
Kun igo lang nihangyo ang mayor nga buhian way nagpugong sa kapolisan nga balibaran ang hangyo. Gawas lang kon nigamit na og pwersa ang mayor aron pugson pagpagawas ang mga dinakpan.
* * *
- Latest
