Makat-on sa leksyon

Nagbilin og daghang patay ug dakong kadaut sa mga butang ug patigayon ang bagyong Ompong sa iyang pagbisita sa Northern Luzon.

Kini bisan pa man sa mga pagpangandam nga gihimo sa mga lokal ug nasudnong kagamhanan sa pag-abot sa bagyo.

Tungod sa pahibawo sa PAGASA nga mobisita sa Pilipinas ilabi na sa Northern Luzon ang ilang gihulagway nga Super Typhoon Ompong, ang mga lokal ug nasudnong kagamhanan nihimo dayon kutob sa ilang mahimo aron malikayan og dili magbilin og daghang kinabuhi nga makalas ang mobisitang si Ompong.

Tungod sa pagkasigurista bisan gani ang mga lokal nga opisyal dinhi sa Central Visayas nangandam usab sa pagbisita ni Ompong bisan og dili kini direkta nga mobisita dinhi sa Visayas area.

Pero nganong daghan man gihapon ang gibiling patay ni Ompong wala pa ni labot sa patigayon nga naapektuhan ug mga butang nga gipangguba ni Ompong.

Kon ang kadaut ang hisgutan dili na lang nato apilon og kwenta ang mga pananum ug ang kadaut sa kalikupan tungod kay sigurado man gyud ni silang maapektuhan kon adunay bagyong moabot kay dili man ni sila parehas sa tawo nga pwede makahupo, makadagan ug makatago.

Ang mga pananum bantang gayod nga maigo sa bagyo mao na nga dili na lang nato sila apilon pagkwenta sa kadaut.

Busa ang mga gidaghanon sa patay na lang ang atong kwentahon nga nahimong bunga sa nataligam-an sa gihimong pagpangandam. Wa man gud maapil sa pagpangandam ang kaluwas sa mga madangpan nga dapit sa mga biktima sa bagyo.

Sigun sa atong naobserbahan ang mga biktima sa bagyo didto nanagan ug nitago sa ilang gituohan nga luwas nga lugar apan gilubong hinoon silang buhi niini mao nga iapil unta sa mga lokal ug nasudnong kagamhanan ang pagsuta ug ang pag-apil sa ilang pagpangandam ang pag-ila sa mga dapit nga luwas tagoan.