Digital natives

Sila ang kabataan nga anaa karon sa digital world kansang interest nakatutok sa mga gadgets sama sa cellphone, computers ug uban pa.

Dawaton nato og sa dili mao na kini ang kamatuoran karon nga dili na kapugngan.

Moingon ang uban nga depende sa pagdala sa mga ginikanan kon pasagdan ang mga anak nga maadik sa mga gadgets. Tinuod mahimo natong mga ginikanan nga did-an ang mga bata paggamit og mga gadgets apan gikinahanglan pud nga makahibalo ang atong mga anak sa pagsagop sa modernong kabag-ohan.

Inay did-an nato sila sa pag-explore sa digital world, ato na lang silang giyahan sa paggamit niini alang sa kalamboan sa ilang kinaadman.

Para nako panahon na nga mosulod usab kita sa bag-ong kalibutan sa atong mga anak aron masabtan ug masakyan nato ang ilang hilig.

Sama sa usa ka magtutudlo sa Science Technology Education Center (STEC) sa Basak Elementary Department sa Dakbayan sa Lapu-Lapu.

Si Dr. Rubilyn Pastrano, gigamit niya ang teknolohiya sa pag-umol sa kaalam ug katakos sa iyang mga tinun-an.

Cellphone, Laptop computers ug ubang gadgets ang iyang mga tools imbis ang naandan nga blackboard ug chalk. Ang mga modernong digital tools ug mga educational application ang epektibo niyang na-apply sa iyang mga tinun-an sa elementarya.

Nasaksihan nako ang teaching methodology ni Dr. Pastrano nga gaan ra kaayo nga gisagop sa mga tinun-an nga gitawag niyang mga digital natives o digital citizens.

Kon nahimo ni Teacher Rubilyn ang paggamit sa digital tools alang sa epektibong pagtudlo sa mga bata, mahimo usab kini sa uban.

Ang kabag-ohan karon nga maoy gisudlan sa atong mga anak, lahi na itandi sa panahon sa atong pagkabata.

Suportahan nato sila apan atong i-regulate ug labaw sa tanan giyahan aron magamit nila sa kalibutan nga ilang padulngan. Dili pa ulahi natong mga edaran magkat-on usab ta sa teknolohiya aron mahisakop kita sa kalibutan sa mga digital natives.