Pwede bang mabakwi ang amnestiya?

Gisalikway sa Korte Suprema ang gipangayo ni Senador Antonio Trillanes IV nga temporary restraining order aron mapugngan ang mga pulis sa pagdakop kaniya human gimando ni Presidente Duterte ang pagpadakop sa senador tungod sa pagpawalay bili ni Presidente Duterte sa amnestiya nga gihatag sa gobiyerno ni Presidente Noynoy Aquino para kang Senador Antonio Trillanes IV pito ka tuig na ang nakalabay.

Kahinumduman, si Lieutenant Senior Grade Antonio Trillanes IV nag-atubang og kasong kudeta ug rebellion tungod sa pagpangulo niini sa Oakwood Mutiny ug Manila Peninsula Hotel Seige niadtong tuig 2003 ug 2007. Gawas sa mga maong kaso si Trillanes nag-atubang sab og kaso sa court marshal isip militar. Apan gihatagan siya og amnestiya ni kanhi presidente Noynoy Aquino hinungdan sa pagkahanaw sa tanang kaso nga gipasaka batok kaniya ug napili usab siyang senador.

Apan si Duterte nipagawas og Proclamation Order No. 572 nga nagdeklarar sa amnestiya ni Trillanes nga void ab initio tungod kay wala gisunod ang proseso sa paghatag niini hinungdan nga iya dayong gimando ang pagpadakop sa senador. Tungod sa mando sa presidente wa na mogawas sa senado si Trillanes kay nahadlok dakpon sa pulis ug nidangop sa Korte Suprema ug gikwestyon ang mando sa presidente. Ang pangutana sakto ba ang gihimo ni Duterte?

Sigun sa atong Batakang Balaod ang paghatag og amnestiya gahom kini sa presidente apan nanginahanglan kini og concurrence sa kongreso busa sigun sa mga abogado ni Trillanes ang pagbakwi sa amnestiya nanginahanglan usab kini og concurrence sa kongreso.

Busa kon atong tinambanon sa pagsabot ang pagbakwi sa amnestiya dili pwede nga ipaagi lamang sa usa ka proclamation order. Hinoon kining maong pangutanang puntong legal anaa pa sa hukmanan busa ato lang sa nga paaboton ang hukom sa hukmanan.

Pero para nako ang pagbakwi sa amnestiya nga gihatag makapahuyang kini sa maong gahom ug wala unyay gusto nga mogamit niini tungod kay pwede ra man diay bakwion.