EDITORYAL - Kudeta na pud?

Pila na man ka mga presidente sa Pilipinas ang gihulga niining mga kudeta ug pipila lang ba ang milampos?  Usa ra gyud ka kudeta ang milampos, kini dihang gisipa pagawas sa Malacañang ang diktador nga rehimeng Marcos. Daghan ang mga misuway pag-alsa batok sa mga nisunod kang Marcos sama nilang  Corazon Aquino, Fidel V. Ramos, Joseph Ejercito Estrada, Gloria Macapagal Arroyo ug kang Noynoy Aquino nakatilaw gyud og mga hulga sa kudeta.

Apan sa tanan ang pamunoan sa duha ka babayeng pangulo lamang adunay nahitabong aktibong kudeta sa mga sundalo nga gipangulohan nilang Colonel ug kanhi senador Gregorio Honasan, kanhi Brig.General Danilo Lim, kanhi navy Lieutenant Senior Grade ug karon Senador Antonio Trillanes IV ug uban pa.

Apan silang tanan wala molampos sa ilang mga tinguha, kay wala man sila suportahi sa katawhan. Natapos gyud sa mga presidente ang ilang mga termino gawas na lang kang Estrada. Si Estrada nga gikasohan tungod sa kurapsyon pugsanong nga napakanaog sa pwesto dili pinaagi sa military coup kondili sa masa nga wala na ganahi niya.

Karon aduna na say nigawas nga mga reports ug gikompirmar mismo ni Defense Secretary Delfin Lorenzana apan gikan sa New Peoples’ Army ang hulga.

Kanus-a pa man gud nahitabo nga ang mga rebeldeng komunista nisuporta og presidente sa Pilipinas?

Matud niya, wala silay nadawat nga beripikadong report nga magkudeta ang oposisyon ug kadtong mga giingong nisuporta sa kawsa ni Trillanes.

Nganong may mga sama niini nga report tungatunga niining grabeng pagsaka sa mga presyo sa palaliton, presyo sa lana, kakuwang sa supply sa bugas ug niining gihulagway nga pagpanglutos ngadto sa mga taga oposisyon?

Wala pa gani masulbad kining maong mga problemaha aduna nasay laing mas dakong problema? Kanus-a man intawon patilawon ang mga Pilipino og malungtaron ug mabungahong pagpuyo?

Nahimo na lang kataw-anan ang Pilipinas tungod sa pagsige og unay-unay. Angay tingali kining hinuklogan og maayo sa mga Pilipino.