Trillanes mi-spark

Abi ni Senador Antonio Trillanes IV kon forever na ang iyang pagkagawasnon nga sige’g tira batok ni Presidente Rodrigo Roa Duterte, diin kulang  sa merito ang katinuod ug walay igong basehanan.

Si Duterte presidente. Si Trillanes senador. Pulos sila sulogoon sa nasod. Isip presidente, siya ang modiskarte unsaon niya pagpauswag sa nasod.

Ug isip senador, dapat ang senador moabag sa bisan unsay vision-mission nga nahunahunaan sa  presidente alang sa kaayohan sa katawhan.

Sundalo si Trillanes. Nasayod sa golden rule sa militar, ‘Obey first before you complain’, pero makalibog!  Kay imbes mosunod ni Duterte, nagpunay hinuo’g complain and complain?

Unya, wa pa gyuy hunong paglabay’g lapok kang Duterte.

Okay ra unta kon si Trillanes proven good and a clean public servant. Unya, otro man pud nga naglunang sa lapok.

Aw, wala magmahay si Trillanes sa iyang kasuberbiyo manulti batok ni Duterte.

Napangitaan gyud siya’g lungag ni Solicitor General Jose Calida, kinsa mipalili niini ni Duterte aron makita nga kadtong paghatag og amnesty ni kanhi Pres. Noynoy Aquino ngadtong Trillanes, depektoso.

Wala kuno kini makasumiter og application form sa amnesty. Pero, hugot nga gipanghimakak ni Trillanes kay naka-comply kuno siya.

Sa pagpamulong ni Duterte didto sa Davao human sa iyang biyahe sa Israel, tungod kay depektoso ug siya nay pangulo sa Pilipinas, may gahom siya sa pagrebokar niini.

Dinhay taga ABS-CBN reporter nga nangutana kon unsa man kunoy mahitabo sa ubang sundalo nga kauban ni Trillanes, kinsa nahatagan po’g amnesty, marebokar ba usab ilang sertipiko?

Tanlas kaayo ang tubag ni Duterte: “It’s my prerogative to choose who among them shall be granted a continous amnesty.”

Matod niya, nga mahimo kang Trillanes ray iyang irebokar samtang ang uban dili na niya hilabtan.

Hala, no? Katin-aw kinsay giigo sa maong mensahe. Busa, normal lang, nga si Trillanes, mi-spark!

Makaipsot pa kaha ang sundalong senador ning nagngangang atob nga iyang giatubang?