Kuyawa na uy!

Ang pagpusil ni Ronda municipal Mayor Mariano Blanco sulod sa iyang opisina kagahapon sa kaadlawon, makapahadlok niadtong mga tawo nga may hulga sa ilang kinabuhi, ilabi na kadtong giingong nalambigit sa drugas.

Dili ko moingon nga si Mayor Blanco nalambigit gyud sa ilegal nga drugas, apan naapil ang iyang ngalan kaniadto nga anaa sa watchlist.

Pwerteng isoga sa mga mipusil kang Blanco kay misulod gyud sa opisina sa mayor, ug gibalewala ra gani ang mga tawo nga guwardiya sa opisyal.

Tingali, tungod sa hulga sa iyang kinabuhi, ang mayor didto na lang matulog sa iyang opisina sa munisipyo, apan wala kini makasalbar kaniya kay giadto gyud gihapon siya sa mga kriminal.

Pastilan, ang higala nako nga si Daanbantayan Mayor Vic Loot, angay na gyud nga magbantay.

Ambot kon nganong nadudahan man si Loot nga kakunsabo, or protektor sa mga tigpayuhot sa drugas nga dihang naminaw ko sa House Inquiry, wala may direkta nga nakatumbok ni Loot nga nagdawatan og kuwarta, o kaha mimando nga buhian ang mga dinakpang drug lord.

Unya, kamong uban diha nga gikatahapan nga nalambigit gihapon sa ilegal nga drugas, pagbantay mo. Ayaw gyud mo pagkumpiyansa kay basin og moabot na lang ang higayon nga makalitan na lang kamo.

Ang tinuod, nagduda man gyud ko nga ang kagamhanan nagpaluyo sa ubang mga pagpanglikidar sa mga tawo nga gikatahapang nalambigit sa ilegal nga drugas.

Wala tingali kamo malimot nga dihang mianhi si Presidente Duterte dinhi sa Sugbo pipila ka buwan ang nakalabay, wala kini pugongpugong sa pagpasidaan nga kadtong mga nalambigit sa drugas nga dili moundang, moligdas gyud nga patay.

Ang sugyot unta nako nga mas labing maayo nga unahon nila ang mga polis ug ubang tinugyanan sa balaod nga protektor, ug kadtong mga nag-body guard og drug lord.

Dili ikalimod nga daghan pa kaayo ang mga nalambigit sa drugas nga wala pa mohunong kay gianugnan sa kadako sa kita sa pagpamaligya og shabu.

*  *  *

Kining mga pagpamatay nga nahitabo dinhi sa atong palibot, diin ang mga biktima gikatahapan nga nalambigit sa ilegal nga drugas, dili gyud kini masulbad.

Dili na lang nako idetalye pag-usab ang mga hinungdan kay kadtong mga nagsunod sa akong mga lindog, nasayod na niini.

Nakabantay tingali kamo nga wala man gyud ayoha pag-imbestigar ang nahitabo nga pagbanhig sa PDEA Agent nga si Von Rian Tecson ug kadtong giingong pagkapatay ni SPO1 Balili nga matud pa naunay sa iyang armas samtang nag-surveillance didto sa

Pinamungajan.