Palpak

Dili na ikahibong ang pagbawi ni Presidente Rodrigo Duterte sa amnesty nga gihatag sa gobiyerno ngadto ni Senador Antonio Trillanes. Kini tungod kay sa tanang sakop sa oposisyon siya maoy labing sabaan ug kritikal sa administrasyon, gawas ni Senador Leila Delima nga una nang nabanlod sa bilangguan tungod sa pasangil sa kalambigitan sa negosyo sa drugas sulod sa New Bilibid Prison.

Tataw nga gipangitaan gyud og paagi sa administrasyon unsaon nila nga maguyod pagbalik sa prisohan si Trillanes aron paghatud sa lanog nga mensahe ngadto sa ubang mga kritiko. Niadtong Agosto 31 giluwatan ni Duterte ang Proclamation 572 nga nagbawi sa amnesty nga gihatag kang Trillanes ni kanhi Presidente Benigno Aquino III.

Si Trillanes nag-atubang niadto og duha ka kasong rebellion dihang iyang gipangulohan ang mga junior officers sa Armed Forces of the Philippines pag-alsa batok sa administrasyon ni kanhi Presidente Gloria Macapagal Arroyo. Una niadtong 2003 dihang ilang gihimo ang Oakwood Mutiny ug ang ikaduha niadtong 2007 dihang ilang giokupar ang Manila Peninsula Hotel didto sa Makati. Apan tungod kay alyado siya ni Aquino gihatagan siya niini og amnesty niadtong 2010.

Apan sigun ni Duterte way bili ang maong amnesty hinungdan nga iya ning gibawi. Duha ka mga rason ang gihimong basihan ni Duterte. Una, wala kuno siya mosumitir og aplikasyon. Ikaduha, wala siya moangkon sa salaud nga iyang nahimo.

Nunot niini gimando ni Duterte ngadto sa AFP ug sa Philippine National Police nga dakpon si Trillanes ug ibalik sa bilangguan aron ipadayon ang iyang mga kaso.

Ang mga batid sa balaud nagkanayon nga sayop ang gihimo sa Malakanyang. Pulos palpak ang basehanan sa Presidente tungod kay nakapakita man si Trillanes sa iyang aplikasyon ug base niini iyang giangkon ang salaud nga iyang nahimo. Kinsa may angayang manubag sa dakong palpak pagluwat ni Duterte sa Proclamation 572? Nagpasapasa na ang mga opisyal nga responsabli paglipat sa Presidente. Matud sa Department of Justice wala diay nila maayo pagsusi ang mga dokumento sa kaso ni Trillanes.

Sukad sa sinugdanan wala gyud kong kauyon ni Trillanes. Apan di sab tingali makiangayon nga manglaktud ang Malakanyang sa legal nga proseso aron pahilomon ang iyang mga kritiko. Di husto ang pagmando ni Duterte nga dakpon si Trillanes tungod kay diktador lang nga pamunoan ang makahimo niini.

Sa usa ka demokrasya sama sa Pilipinas, hukmanan lang ang dunay gahom pagmando nga dakpon sa usa ka tawo.