EDITORYAL - Nindot nga paagi

Nindot ang lakang ni Mayor Tomas Osmeña nga ang Dakbayan sa Sugbo makig-coordinate sa grupo nga Angkas aron nga makapahimulos sa ilang communications network, kun Apps, ang mga kabus nga gustong manginabuhi gamit ang ilang motorsiklo.

Pagkakaron, daghan ang mireklamo sa mga mosakay og motorsiklo nga gitawag og “habal-habal” kay matud pa ang uban sa mga drayber magpataka lang og bungat sa plitehan nga pangayoon nila sa ilang mga pasahero, bisan og duol ra unta kaayo.

Kon ang kadaghanang “habal-habal” marehistro na sa Angkas, pinaagi sa kagamhanan sa dakbayan, dili na makapangayo og dagko nga  plitehan ang mga mapahimuslanong drayber kay may kantidad na man nga maoy kolektahon nga ilatid sa Angkas, base sa gilay-on.

Sa ingon niini nga paagi, dili na mabentahaan ang mga pasahero, ingon man, mamenosan na usab ang kahasol kay ang mga drayber dili na magpundok sa usa ka lugar nga magpaabot og pasahero. Kon magpundok gud ang mga habal-habal sa usa ka dapit, makahasol sila sa trapiko.

Kini hinoong paagi ni Mayor Osmeña dili gayud hingpit nga makawagtang sa unregistered nga habal-habal kay ang Angkas dili man modawat sa mga karaan ug gubaon nga motorsiklo, ilabi na kon walay rehistro ang motor, ug walay lisensya ang drayber.

Gawas pa niini, kinahanglan nga ang drayber nga ma-accredit sa Angkas makapakita og NBI ug police clearance nga magmatuod nga wala sila’y criminal records.

Ang nindot nga buhaton sa kagamhanan sa dakbayan mao nga hingusgan gyud ang kampanya batok sa mga namasahero isip drayber sa “habal-habal” apan wala sila mokuha og lisensya sa pag-drive og sakyanan, ingon man walay rehistro ang ilang mga motor. Kining mga tawhana maoy mga sagad badlungon diha sa atong kadalanan.