Pulis batok mayor

Mahinungdanon kaayo ang maayong relasyon tali sa lokal nga kagamhanan ug sa kapolisan ilabi na sa epektibo nga pagpatuman sa kahapsay ug kalinaw.

Lahi ang nahitabo karon sa Cebu City kansang relasyon  ni Mayor Tomas Osmeña ug sa mga opisyal sa Philippine National Police sa siyudad ug sa rehiyon nabutangan na karon og bana o ‘lamat’ sa tinagalog pa.

Kini tungod sa mga isyu nga wala mauyoni sa mayor sama sa sunod-sunod nga patay diin gidudahan niini nga ang mga nagpaluyo anaa ra usab sa gobiyerno.

Karon nahisama na sa lugas lanot ang kalambigitan sa kapolisan ug sa mayor tungod sa gikatakdang pag pasaka og kaso sa kapolisan batok sa mayor.

Kini human giarbor ni Osmeña ang tulo ka mga lalaki nga nadakpan sa mga sakop sa Parian Police Station tungod sa pag-refil og butane canister.

Sumala ni Senior Supt. Royina Garma, pangulo sa Cebu City Police Office nga ang gihimo sa mayor usa ka obstruction of justice, ug abuse of authority.

Gikatakda kining ipasaka sa kapolisan batok ni Osmeña tungod sa iyang pagpanghilabot sa trabaho sa mga pulis.

Ang pagsang-at sa kaso duna na kunoy go signal gikan ni Chief Supt. Debold Sinas pangulo sa PRO-7.

Kon mahinayon man ugaling ang kiha, mao na seguro kini ang unang higayon nga mopaak ang pulis sa mayor.

Lahi kaayo kaniadto nga murag itoy ang mga pulis nga magsunodsunod sa isulti o imando sa local chief executive.

Karon murag iro na nga mopaghot ug mopaak kon matumban ang ikog sa liderato sa PNP sa dakbayan sa Sugbo. Tan-awon nato kon dili ba mobahag ang ikog sa kapolisan sa higayon nga mapasaka na ang kaso batok ni Mayor Tomas Osmeña.

Unsa pud kaha ang counter move ni Osmeña sa lakang karon sa CCPO pagpanubag kaniya sa hukmanan?

Maayo unta kon kutob ra kini sa trabaho lang apan lisod na unya kon mahulog na unya sa personalan kay mabutang sa peligro ang serbisyo sa katawhan.