Husto gyud ang akong report

Dihang mihisgot ko pagbalik sa mga ilegal nga sugal nga mikuyanap na pag-ayo sa mga dapit sa Dakbayan sa Sugbo, ingon man sa hapit tanang kalungsoran sa probinsya, daghan gyud sa mga tigbasa og Banat News nga mimatuod nga husto ang atong report.

Ang informer nako sa lungsod sa San Remigio, mitaho nga ang mga Small Town Lottery (STL) outlets diha sa maong lungsod nga sakop sa 4th congressional district, mobaligya kuno og masiao. Matud sa report nga ang mopalit papilion lang kon ang legal ba, o ang ilegal.

Awhagon nako ang kapolisan sa San Remigio ug Bogo, nga aksiyonan ninyo ni kay maghatag kini og bati nga dungog kaninyo nga magtuo ang katawhan nga nagdawatan mo og payola gikan sa masiao.

Dili lang nako ibutyag ang tinuod nga mga ngalan, apan ayaw ko og ingna nga ang kapolisan wala makaila niining gianggaan og Nesing ug Ruel nga mao kuno ang nag-operate sa illegal swertres diha sa Bogo ug San Remigio ug kanait nga mga lungsod?

Anha kuno i-remit ang halin sa illegal swertres sa usa ka building diha sa Barangay Pamintaw, dili layo sa ospital. Bi, susiha ninyo ni mga polis diha sa Bogo ug San Remigio. Dili mo makalimod nako kay taga diha ko ug daghan kaayo’g kontak.

* * *

Namakak gyud ning mga polis sa Station 6 nga nagbase diha sa Barangay Sawang Calero. Giingnan nila si Cebu City Police Director Royina Garma nga gipangsakmit na kuno nila ang midagsang nga video karera ug moli-moli, unya gikampanyahan na kuno ang illegal swertres.

Apan ang “credible” kaayo nako nga inpormer diha sa Barangay Suba mikontak nako ug miingon nga dakong bakak ang pangangkon sa mga polis sa Station 6 nga napaundang na nila ang illegal gambling machines ug ang illegal swertres.

Ang akong inpormer miingon nga unsaon pag-undang sa mga ilegal nga sugal diha sa Suba ug Pasil nga ang uban kuno nga opisyal sa barangay, nagtinil man og video karera ug moli-moli ug ilang gi-operate. Duna kuno’y drug lord nga milaylo lang usa kay init pa kaayo ang kampanya sa drugas, mibalik pag-operate og video karera ug moli-moli diha sa Suba ug Pasil.

Samtang dunay usa ka video karera operator nga taga Ermita tua na mag-operate sa  dakbayan sa Talisay kay hinay kuno didto sa kampanya batok sa drugas ug walay mga polis nga manakmit og karera.

Kamong mga polis, lihok mo uy, klaro na kaayo mo.