Miatras ang buyer tungod sa annotation sa title

Dear Atty. Divine:

Ang akong papa nga namatay last year dunay property nga gibilin sa probinsya og 5-hectares kini, titulado ang maong property ug plano namong ibaligya. Duna na unta mi nakit-an nga buyer nga interesadong mopalit sa property apan  miatras ang buyer kay duna may annotation sa Notice of Lis Pendens ang title sa property sa Register of Deeds. Tulo mi ka magsuon unta nga magbahin niini attorney apan  wa mahinayon ang buyer tungod niining maong annotation. Unsa may angayan namo nga buhaton aron matangtang kini nga annotation? Unsa may buot ipasabot anang Notice of Lis Pendens? Daghang salamat.  —Romeo

Dear Romeo,

Ang Notice of Lis Pendens usa kana ka announcement o pahibawo sa tanan nga kanang yutaa dunay pending nga kaso sa korte hinungdan  nga kadtong gustong mopalit o modawat og prenda niini magduha-duha gyud tungod sa maong risgo. Ang maayo ninyong buhaton mao ang pagsuta sa korte kon unsa nay status sa kaso? Kon pananglit nadesisyunan na ang kaso pabor sa imong papa og duna nay finality ang desisyon then mamahimo na ninyong ipa-cancel ang annotation sa Notice of Lis Pendens sa title pinaagi sa pag-submit sa Register of Deeds og Certified True Copy sa desisyon  sa korte og sa copy sa Certificate of Finality. Apan kon wa pa gani maresolbar ang kaso mas maayong makigtagbo mo sa abogado sa imong papa nga maoy nagrepresentar kaniya sa maong kaso ug inyong estoryahon ang lawyer kon unsaon nga mapadali ang kaso ug ang posibilidad nga pagpakig-settle  sa parties nga involved niini. Thanks and God bless.— Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_ [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.