Tungod sa sigeng patay, bars mihinay

Kaniadto sa wala pay war on drugs, ang dalan General Maxilom o Mango Avenue, bisa’g alas singko na sa buntag, daghan lang gihapong hubog ang magpanon maglakaw-susapinday sa dalan. 

Usab ang dalan Juana Osmeña Ext. kilid sa gate sa relihiyosong eskuylahan gihimong estambayan pud sa mga indayhilay kang kansang panginabuhi mao ang pagtahan sa binayrang kalipay nga “when the price is right.”

Ang mga lalaking hubog nga gikan nagtan-aw og sayaw nga hubohubo sa mga disco bar, sagad anhi dinhi mang-pick up kay ang mga maldita nagpatuo nga mga estudyante, unya ang tinuod, taga Kamagayan diay.                

Dinhay mga higayon nga ang mahilas sayawsayaw miabot na sa kilid sa karsada, diin ang gihimong entablado mao ang lamesa nga gialirongan sa mga kustomer nga nanag-inom. Saba kaayo ang mga suliyaw sa kinataw-anay nunot sa kabanha nga gitugtog sa kiat ug yabag nga sonata.

Daghang adik. Daghang hubog.

Sila sa maong alingisig nga kahimtang nagkapundok. Diha sa ilang lihok ug sinultian mailhan nga wala na sa husto nilang panghunahuna. Dunay away. Naay magpinusilay. Sa dili pa si Tatay Digong ang presidente sa Pilipinas, ang mga drug user, drug pusher, labaw na ang druglords wa gyuy gikahadlokan sa paggamit, pagpamaligya ug pagnegosyo ning gidiling drugas nga makapaluag sa tuwerka sa utok sa tawo. Hasta public officials (hinuon dili tanan) miapil sab.

Kasagaran sa gipangluthang sa dalan kaniadto mga drug pushers, kinsa matud pa, mitambling, or wala mo-remit sa ilang kita ngadto sa giangkatan nilang shabu. Pero ang maong matang sa patay, wala gyud makapadiyotay sa users ug pushers. Misamot hinuon paglipang.

Dili sama ning pagpanghingusog  sa war on drugs ni Duterte nga halos kada adlaw adunay gipangtumba sa kadalanan, kinsa sagad, mga drug users,  players ug producers nga usahay maapil pa ang walay labot nga inosente. Busa, kinsa bang isoga ang dili mahadlok  mosulod og mga balay-kahilayan? Nga ultimong daotang linalang nga magbag-o na unta sa kinabuhi, bisag anaa ra sa ilang tugkaran, gitirahan-patay  gihapon.

So, no wonder, nga ang halin sa mga bar ug imnanan karon, mohinay gyod!