Panerbisyo nga tinarong

Nindot gyud kaayo ang tinguha ni Konsehal Renato “Junjun” Osmeña nga pahugtan ang kampanya sa kagamhanan sa Dakbayan sa Sugbo batok sa mga tawo nga motukod og estraktura nga milapas na sa aseras, ilabi na gyud ug anaa na kini sa karsada.

Apan para kanako, dili na man magkinahanglan pa og ordinansa ang pagpangguba sa maong mga estraktura.

Ang buhaton lang mao ang pagprobar nga ang gitukoran sa maong mga estraktura, iya na kini sa gobiyerno.

Ang mga tag-iya sa maong mga estraktura makasabot man gyud nga kay dili man ila ang yuta nga gitukoran, obligado gayud sila nga moguba niini kay para man kini sa publiko.

Unsaon man gud nga gipasagdan ra man kining maong problema sa mga nagdumala sa kagamhanan, ug sa paglabay sa daghang katuigan, nahimo na nga dakong problema.

Diha lang sa V. Sotto Street sa Barangay Tinago, ning Dakbayan sa Sugbo, dunay lapad nga aseras apan gihimoan og garden nga gitamnan og lainlaing tanom. Sa atbang usab, kanang karsada paingon sa barangay hall sa Tinago, dunay aseras nga giukopar na sa mga nagpuyo diha.

Naa man gani gitukod nga kwarto sa aseras. Bisan ang higala nako nga si Konsehal Joel Garganera nga taga diha sa maong dapit misanong nga tinuod ang akong nabantayan.

Ang tukma lagi unta nga buhaton sa Probe Team nga gipangulohan ni Raquel Arce mao ang paghimo og “program of works” nga magtakda sa mga hawanan nila karong semanaha, sa sunod semana, ug sa umaabot pa nga mga adlaw.

Dili kay pat-ak-pat-ak nga paghimo’g kampanya. Kaniadtong miaging semana, gihangyo nako si Raquel Arce, ang hepe sa Probe Team, nga hapsayon ang mga tindahan sa mga namaligya og imahen sa mga santos likud sa Basilica.

Giaksyonan dayon ni Arce ang akong reklamo. Apan dili ingon niana ang sistema sa pagpanarbaho. Bisan og walay moreklamo, trabahuon gyud.

Bisan og ang mga sakop sa Probe Team maglakaw nga paingon na nga mopauli sa ilang balay, apan may nakit-an siya nga ilegal na, kinahanglang iyang badlungon.

Mobadlong man gani ko nga wala ko’y katungdanan sa siyudad.

Dihay higayon nga usa ka tawo nga nagsakay og motorsiklo, gibabag ang iyang motor sa agianan sa mga pedestrian, kay nag-withdraw siya’g kuwarta sa bangko diha sa eskina D. Jakosalem ug Legaspi.

Gibadlong nako ug mipatuo. May nagmotor sab nga gibabag sa sidewalk ang iyang motorsiklo kay mopalit siya’g piyesa sa usa ka tindahan sa D. Jakosalem, duol ra diri sa among opisina.

Akong gibadlong. Ingon niana gyud unta ang buhaton sa mga opisyal ug kawani sa kagamhanan.