Balaang Bata moduaw sa Isla

Sa labing unang higayon bisitahon sa imahen ni Senyor Sto. Niño de Cebu ang isla sa Olango ug moestar Siya sulod sa tulo ka adlaw.

Mahitabo kini karong Domingo, Agosto 19 diin gikan sa Basilica del Sto. Niño dad-on ang imahen padung sa pantalan sa Punta Engaño.

Isakay ang Balaang Bata sa barko sa Jumalia shipping alas dos sa hapon padung sa Olango Island.

Mouban usab ang mga sakayan gikan sa isla nga mosugat na sa sakyan sa imahen alang sa fluvial nga modunggo sa pantalan sa Sta. Rosa.

Gipangandaman og maayo sa kagamhanan sa dakbayan sa Lapu-Lapu ang maong kalihokan kay unang higayon kini nga mahimamat sa mga taga isla nga deboto si Senyor Sto. Niño.

Hugot nga seguridad ang ipatuman diin dunay augmentation force ang mouban ug ipatakap sa isla.

Molanat hangtod sa petsa 21 ang pa- estar sa imahen diin suroyon Niya ang mga barangay sa isla sa Olango.

Ang katawhan sa isla mihangop niini tungod kay sila na mismo ang gibisita sa Balaang Bata, inay sila ang molabang ug moadto sa Basilica aron moyukbo sa Batang Hesus.

Maayo kini’ng lakang nga gihimo sa kadagkoan sa Basilica nga sila mismo mopaduol sa katawhan aron mas mapalig-on ang pagtoo ngadto sa Kahitas-an.

Ang kainit sa paghigugma sa mga deboto mosamot pa og dili matarog sa mga pagsulay nga moabot ilabi na karon sa mga dautang panghitabo sa palibot.

Kini maoy magsilbeng iwag sa paglaum sa katawhan nga gihatagan sila og importansya sa kadagkoan sa simbahan nga sagad makita lang sa simbahan.

Dili ikalimod nga adunay mga magtotoo nga nabugnaw ug ang uban gani nadani na sa ubang grupo o relihiyon nga kugihan kaayo nga mopaduol sa katawhan nga nagsangyaw sa ilang pagtoo.

Busa dako kaayo og impact ang pagbisita ni Senyor Sto. Niño sa pagpabilin sa siga sa suga sa paglaum ug pagtoo sa mga deboto.

Gani adunay ubang tawo nga dili katoliko apan nabihag sa kaaghop ug karisma sa Balaang Bata nga si Senyor Sto. Niño.