Pag-boycott di maayong ehemplo

Hugaw ang eleksiyon sa Pilipinas. Gikan sa gamay ngadto sa kinadak-ang matang sa piniliay walay mapili. Tanang politiko nga milansar mag-vote buying gyud. Salapi kontra salapi. Pagbinukharay sa tinagoang hugaw nga usahay mosangko ngadto sa lubnganan.

Maayo na lang, sa miaging Association of Barangay Council (ABC) election nga didto gihimo sa Bayfront Hotel, walay dugoong nahitabo sa mga barangay kapitan nga mitambong aron molansar ug mopili. Hinuon, dihay kagawad nga gi-ambush sa maong adlaw, diin malas kaayo ang polis ug asset nga gipasanginlang maoy gustong mobira ni Tejero Kagawad Jessilou Cadungog kay maoy naalaot sa dihang kini napusilan sa bodyguard sa konsehal.

Namatay ang nag-angkas nga polis, kinsa antimanong naigo sa mga bala sa pagpanalipod ug nasikop ang drayber sa motorsiklo, kinsa suwerte kay gipanalipdan pa sa nahabiling kalooy nga naglublob sa kasingkasing sa tawo nga mao untay gusto nilang patyon.

Makapahibulong ang maong hitabo. Kay gitumong gyud og sayo sa buntag sa adlaw sa ABC nga piniliay. Ngano kaha?

Apan wala makasanta ang nahisgotang makapanglimbawot sa balhibong pinusilay. Ang ABC election nadayon gyud. Bisan sulod sa voting area, diin may kanaas nga milanog dihang pinangulohan ni Barangay Mabolo Kapitan Niña ug uban sa iyang mga supporters nga kapitan, 30 tanan, ubos sa Barug Team Rama PDP-Laban mi-boycott tungod sa presensiya ni Mayor Tommy Osmeña.

Base sa ilang alegasyon, gikuwestiyon nila nganong gibuhat man sa mayor ang gidili? Aron ba sa pag-influence sa mga kapitan o pangharas?

Gumikan sa desisyon nga nakab-ot ni Mabatid, giserohan na hinuon siya samtang sa tumang kasayon, midaog si Barangay Kasambagan Franklyn Ong  isip maoy bag-ong ABC President bitbit ang 51 ka botos. Unsaon, mitalaw man dayon si Niña sa pagbutho ni Tommy? Unta, wala siya mi-boycott. Dinhi mahibaw-an kon asa gyud mahipunta ang kasingkasing sa mga kapitan? Sanglit kon may salig pa siya sa kalig-on sa iyang kandidatura, bisa’g sama pa sa bagyong Yolanda ang gahom ni Tomas, dili kini makatarog sa tigbayon nga gitukod niya ibabaw sa bungtod panahon sa iyang pagpangampanya.  Kay walay buotang mag-aalagad nga dili tabangan sa Diyos.

Ang pag-boycott nagtimaan sa usa ka negatibong mga pangagpas. Busa, dili maayong ehemplo.