Grabeng pinatyanay

Duha ka ambush ang nahitabo kagahapon. Ang usa ka tinun-an sa mechanical engineering nga gipusil samtang sulod sa iyang sakyanan didto sa South Coastal Road, habig sa Barangay Cansojong, Talisay City.

Pagkataudtaud, gi-report na usab nga tulo ka piniriso gikan sa Talisay City Jail nga dad-on unta sa korte aron motambong sa paghusay sa ilang kaso, gitipi sab sa mga wala hiilhing tawo.

Ambot og unsay rason nga ang 23-anyos nga si Art Stephen Bas nga bag-o pa nga nakadaog isip konsehal sa Barangay Lagtang, Talisay, gipatay man. Matud sa iyang mga higala nga buotan ang biktima.

Apan ang iyang amahan hinuon nga si Mark Ferdinand Bas, kapitan kaniadto sa Lagtang, naapil kini sa listahan sa Philippine Drug Enforcement Agency (PDEA) nga kuno nalambigit sa gidiling drugas.

Paingon sa CIT University ang biktima diha nga gipusil samtang nagmaneho sa iyang Ford Everest. Nagsakay kuno og motorsiklo ang mga mipatay kang Bas.

Buyno, tambag nako ni bisan kinsa nga angay na gyud kita karon nga magbantay. Bisan og wala ka’y death threats nga nadawat, ayaw’g kumpiyansa, paglingilingi gyud.

Posible sab nga ang amahan ni Art maoy target unta nga patyon tungod sa report nga siya nalambigit sa drugas. Pastilan, mao na kini ang giingon nako niadtong mga nalambigit sa drugas , nga undang na aron dili kamo mangamatay.

Nakabantay gyud ko nga dunay grupo karon sa mga tawo nga gitahasan paglikidar sa mga nalambigit sa drugas, apil na ang mga polis. Dili ba pre?

* * *

Unya, tulo ka piniriso napatay usab sa ambush didto sa Barangay Linas, Talisay. Duha sa napatay, nalambigit sa ilegal nga drugas, ang usa frustrated murder.

Leksyon kini sa mga daotang tawo nga kon dili sila mobiya sa ilang kabuang, aw mangamatay gyud sila. Ayaw na lang kamo pangutana kon ngano nga wala maapil ang mga guwardiya nga nag-escort sa mga piniriso.

Ayaw usab ko ninyo pangutan-a kon ngano nga wala makapabuto ug makasukol ang mga jail guards aron pamusilon ang mga mipatay sa piniriso nga ilang gibantayan.

May nakadungog nga kadtong gipatay, dako kuno kaayo og utang kanila. Ambot og ngano nga duna man sila’y utang. Unsa man, utang sa shabu?

Kon ingon niini kanunay ang mahitabo, siyaro og dili mangalisang ang mga tawo nga daotan. Pero, dunay misugyot nga mas nindot gyud unta nga apilon na lang sab kining ubang tawo nga nalambigit sa ilegal nga kalihokan.