Mas mahal pa ang palaliton

Nahimong normal nga talan-awon ang pinatyanay karon. Ang buto sa mga pistola nahimong musika sa dalunggan sa mga tawong samaran. Nahimong samaran gumikan sa dakong panginahanglan nga mobawos gikan sa kapintas ug tinamblingang pagpanikas sa uban.

Nahimong hinanaling sulbad ang pagpatay sa pamasin nga dili maghuot ug magmasakit ang mga binilanggo. Hinuon, ang kapintas lisud sabton kon ikaw mismo ang mahimong pintas usab sa imong kaugalingong paagi. Samdan man kita apan lisud tugkaron kon nganong ang samad dili man lang hunaran ug tambalan.

Hinunoa, ang samad pun-an og lain pa nga mga samad aron sa ingon mokuyanap ang kangulngol sa gihambin nga kaligutgot ug nag-ampo nga unta ang kaugalingong mga tudlo nga mokablit sa gatilyo sa panimalos. Mahal ang palaliton karong mga panahona ug nahimong barato na kaayo ang kinabuhing sagrado.

Sa diha nga gipiyong ko ang akong mga mata aron sangpiton ang Dios sa kinabuhi, nanumbalik sa akong panumdoman kon nganong sa makausa pa nahimong idlas ang kaangayan ning kalibutang haguka ug tampalasan.