EDITORYAL - Isyu pagtudlo ni Espina

Motambong na sa sesyon sa Cebu City Council karong hapon si Erik Miguel Espina, isip bag-ong konsehal sa Dakbayan sa Sugbo. Nakapanumpa na kagahapon si Espina atubangan ni Court of Appeals (CA) Presiding Justice Gabriel Ingles.

Gitudlo si Espina ni Presidente Duterte nga hulip sa pwesto ni Konsehal James Anthony Cuenco nga gipa-dismiss sa Ombudsman tungod sa anomaliya sa pagpanghatag og mga tambal sa kagamhanan nga ang pundo gikuha gikan sa Priority Development Assistance Fund (PDAF) sa iyang amahan nga kongresista pa niadtong higayona.

Wala na tuod mo-report sa iyang opisina sa City Hall si Konsehal Cuenco, apan giapelar pa niya sa Court of Appeals ang hukom sa Ombudsman nga nagmando sa pag-dismiss kaniya. Dunay mga abogado ang mihulagway nga base sa balaod, wala pa gyud mabakante ang pwesto ni Cuenco sa City Council.

Husto ang ilang baruganan kay si Cuenco miapelar man sa hukom sa Ombudsman, ug wala na lang siya moreport pa sa City Council kay mao man kini ang kamandoan ngadto kaniya. Apan hangtud nga maresolbar gyud kining maong kaso, giisip sa mga maantigo sa balaod nga dili pa unta angay’ng hulipan ang maong pwesto. Unsa may mahitabo kon, human unya sa makuting pagtimbangtimbang sa mga ebidensya ug sa balaod nga gigamit sa Ombudsman, ang Court of Appeals moingon nga walay sala si Cuenco ug dili siya angay’ng silotan sa maong salaod nga gipasaka batok kaniya?

Kon moabot kining maong higayon, si Cuenco mahimong moawhag nga mobalik siya sa iyang pwesto sa City Council isip mga konsehal, unsaon man nga ang iyang pwesto gipulihan na og bag-ong konsehal nga gitudlo mismo sa presidente.

Aw, hinoon, tungod sa kahinay sa sistema sa hustisya sa atong nasud, gituohan nga moabot na lang ang eleksiyon karong sunod tuig, mahimong ang Court of Appeals dili pa dayon makapagawas og hukom sa pag-apelar ni Cuenco sa hukom sa iyang kaso.