Sa iyang diary

Nisulod ko sa National Book Store ug akong nakita ang libro nga naghisgot sa kinabuhi sa batan-ong Judia nga si Anne Frank. Sa linghod nga panuigon siya namatay panahon sa Nazi Regime.

Apan siya nagbilin og notebook diin gitagik ang iyang mga panahom ingon man mga pangindahay ug kasinatian panahon sa krisis.

Nahimo kining classic hangtud karong mga panahona. Wa lang tuyoa nga nakahilak ko nga nagsud-ong sa batan-on nga daghan pa unta og makab-ot, apan naputol gumikan sa kapintas sa tawo.

Kini ang nahitabo sa kalibutan karon, malisud ang pagtugkad sa gitawag natong kalinaw kon ang sistema ug panglantaw naputos sa kapintas ug kabangis.

Si Anne daghan pa unta og tumong sa kinabuhi apan ang Hitler sa kapanahonan mipakgang niini. Daghan ang mga Hitler karon ug daghan ang anaa sa gahum nga buot mo-manipulate niadtong naa sa ubos.

Dili kini kabubut-on sa Dios apan lisud pud kaayo atong isipon nga kini pagsulay sa atong pagtuo kay daghan kanato ang dili maantigong mogamit sa tawhanong kagawasan mao nga daghan nato, mga dagmalan.